Jowai, Rymphang 28: Kum shibynta ban pynshlur ïa ki samla bad ki longkpa ha ka kam mistery dieng, ka Jaiñtia Hills Development Society (JHDS) ryngkat ka jingïatreilang bad ka National Bank for Agriculture and Rural Development (NABARD) ki la pynlong ïaka jingai jinghikai ba 60 sngi halor ka Basic Carpentry lane mistery dieng.
Ïa kane ka training la sdang naduh ka 4th December 2023 bad la pynkut noh ha ka 23rd February 2024. Ïa ka certificate la sam mynta ka sngi kata 28th February 2024 da u Asst. General Manager ka NABARD u Bah. Greville Kharlukhi ha ka jingïadonlang u Director ka JHDS u Fr. Manbha Pakem, U coordinator ka JHDS u bah Denis Kurkalang bad kiwei de ki staff jong ka JHDS.
La pynïaid ïa ka prokram ba lyngkot da u Ma Francis Langlein, Field Programme Associate ka JHDS bad la sam ïa ki certificates ryngkat ba ki Almari sha ki 20 ngut ki nongshah hikai ha kane ka training.
Haba ai jingkren ha kane ka sngi pynkut, u Director ka JHDS u la kyntu bad pynshlur ïa kine kiba la shah hikai ba kin pyndonkam hok ïa ka sap bad ka jinghikai ba ki la ïoh khnang ban wanrah ïa ka ïoh ka kot hapoh ka ïing ka sem jong ki. U la ong ruh ba na ka liang ka JHDS kan pyrshang katba lah ban pynioh ruh sa ia ki tiar ba donkam (Start-up tools) khang ban kyrshan ïa kito kiba don jingthmu ban seng kam lajong.
U Asst. General manager ka NABARD U Bah Greville Kharlukhi u la kyntu bad ai mynsiem ïa kine kiba la pyndep ïa ka training ba kin pyndonkam hok ïa ka skill ba ki la ïoh ha kane ka training na ka bynta ka jingmyntoi ïalade shimet.
Shuh shuh u la ong ruh ba kino kino kiba kwah ban aplai subsidy lane loan na ki Bank ki lah ban wanmih sha ka Ophis treikam jong ka NABARD.
