Yn shongshit sa ki MDC jong ka KHADC ban jied CEM thymmai
6 tarik yn pdiang burom ïa ki MLA PDF
Shillong, Ïaiong 24 : Ka Khasi Hills Autonomous District Council (KHADC) ka lah ban ïoh noh da u Chief Executive Member (CEM) ba thymmai hadien ba ka National People’s Party (NPP) ka la dep ban pdiang burom ïa ki arngut ki MLA na ka PDF.
Ki tyllong khubor ki ïathuh ba la kumno kumno hashwa ka 8tarik u Jymmang ka NPP ka lah ban pdiang burom noh ïa kitei ki arngut ki MLA na ka PDF. “Mynta ka jingïakren ka dang ïaid bad ki bad lehse lada ka kam kan ïaid beit 6tarik ngin pdiang burom noh ïa ki,” ong ka tyllong khubor.
Da ka jingwan pynïasoh jong kitei ki arngut ki MLA, ka jingbun paidbah jong ka party kan kiew sha ka 28 ngut na ka 26ngut, kata ruh khlem pat tip ïa ka result ha Sohiong kaban sa jied nongmihkhmat ha ka 10tarik u Jymmang.
Ha kajuh ka por, la ïoh jingtip ruh hadien ba la dep ka jingpdiang burom ïa kitei ki arngut, kan sa bud pat sa ka jingjied ïa u nongïalam ba thymmai lane u Chief Executive Member ha KHADC.
Kumba long mynta, ïa ka kam CEM ha KHADC la bat da u MDC ka UDP na Sohra, Bah Titos W Chyne katba ïa ka shuki DyCEM pat la bat da u MDC ka NPP Mawshynrut, Bah Gigur Myrthong. Katba ïa ka shuki Chairman pat la bat da u MDC ka NPP na Mawphlang Bah Lamphrang Blah.
Na ki 29 ngut ki MDC, ka NPP ka don haduh kumba 12 ngut ki MDC bud pat sa ka UDP da ki 9 ngut ki MDC, Congress 6 ngut, HSPDP marwei, MDC ka Nongthymmai Bah Latiplang bad ruh u MDC shu sieh, Bah Bindo M Lanong.
Haba ïadei bad kane, ki tyllong khubor ki ïathuh ruh ba ka jingïakren ka dang ïaid shaid shaid mynta na ka bynta katei ka bynta bad la khmih lynti ruh ba lada lah ban pynbeit kloi ki lah ban jied nongïalam ba thymmai ha shwa katei ka por ba la buh.
Wat haba pyrshang ban wad jingtip mano pat ban shimti ïa ka shuki nongïalam ka jubab kaba ki ai ka long, “Ïa kane ka mynta la shaniah pat ha ki para MDC ïano kin jied.”
La ïathuh ruh ba ki jingkylla kin don bun bha ha ka saiñpyrthei ha ka jylla khamtam hadien ba la dep ka elekshon ha Sohiong.
Ban shu pynkynmaw, dang ha ka sngi Saitjaiñ, u National Vice President ka NPP Bah Prestone Tynsong ula pynbna ha Weilyngkut ba ha shwa ka 07 bad 08tarik u Jymmang kan sa don ka jingkylla kaba jur ha ka saiñpythei ha ka jylla. Kumta haba buddien ia kane la ïoh jingtip ba nalor ka jingpynkhreh pyniasoh NPP jong kitei ki arngut ki MLA ka PDF ka la don ruh mynta sa ka jingpynkhreh ban kylliang nongïalam ha KHADC bad ter ter kane kan sa ïai bteng.