New Delhi, Ïaiong 25 : U Carles Caudrat ba dei u coach ba pawnam ka Bengaluru uba la ïalam ruh ïa katei ka kynhun ban rah ïa ka nam lahduh ha ka Indian Super League, u la shah khring noh ha ka Bengal FC kum u head coach ha ka jingïasoi soskula kaba arsnem.
U Caudrat, 54 snem u la wan sha India kum u assistant coach jong ka Bengaluru FC ha ka snem 2016.
Dei ha ka por jong u, kata hapdeng ka snem 2016 bad 2018 ba ka Bengaluru FC ka la ïoh ban khur ïa ka nam lahduh ha ka Federation Cup ba tip ha kato ka por bad bud sa ka jingrah ïa ka nam lahduh jong ka Super Cup bad kylla long ruh ka kynjhun ba nyngkong na India ban poi sha ka final jong ka AFC Cup.
Nangta kadei ha u snem 2018 ba utei u coach na Spain u la shimti kum u head coach jong ka kynhun bad ïalam syndon ïa ka Bengaluru ban khur ïa ka nam lahduh ha ka samoi jong u 2018-2019. Dei hapoh ka jingïalam jong u, ba ka BFC ka la kylla long ka kynhun kaba nyngkong ha ka history jong ka ISL ban khlieh duh ha ka league bad ruh ban khur ïa ka nam lahduh ha kajuh ka snem. Ym tang katta, ha ka snem kaba bud, u Caudrat u la ïalam ruh ïa ka kynhun ban poi shaduh ka playoff.
Hapoh ka jingïalam jong u Caudrat, ka BFC ka la thaw ruh bun ki rekod. Kawei na kine, kadei ka jingjop ban ban khlem shah rem kawei ruh ha ki 11 tylli ki jingïakhun kynthup ïa ki 6 tylli ki jingjop ba khlem sangeh, kaba kylla long ka rekod na bynta kano kano ka kynhun ha ka lympung Indian Super League. Kum u head coach u la lah ruh ban ïalam ïa ka kynhun ban ym pat shah rem kawei ruh ha ki 17 tylli ki jingïakhun ha madan Sree Kanteerava Stadium, ka rekod kaba ym pat don ba lah mano mano ruh na ki kynhun ha ka ISL ha ka jingïakhun ha la iing.
Ka BFC ka la ïoh ruh ban buh nam ïa ka jingjop kaba donburom tam hapoh ka jingïalam jong u da kaba pynliem haduh 9-1 kol ïa ka Paro FC ha ka jingïakhun knieh rung sha ka AFC Cup ha u Rymphang 2020.
Utei u coach hadien ba u la mih noh na India ha ka snem 2020 -2021 u la leit ban pynïasoh noh bad ka club na Cypriot, ka Aris Limassol kum u assistant coach bad ïarap ïa katei ka kynhun ruh ban poi sha ka playoff hadien ba ka la shah kyntiew sha ka Cyprus first division.
Na ka liang ka East Bengal haba kren hadien ka jingpynskhem ïa u Caudrat kum u head coach, u Debabrata Mukherjee u la ong ba ki sngewkmen haduh katta katta ba ki ïoh ban khring ïa utei u coach uba la don bha ka jingtbit ha ka phutbol ha India bad kumta ki khmih lynti ba un lah ban ïarap ïa ka kynhun ba kan kiew ha katei ka lympung.
U ong ruh, “Ngi sngewburom haduh katta katta ïa u Stephen Constantine na ka bynta ka jingshakri jong u ïa ka club ha ki snem ba la dep.”
Katba u Caudrat pat da kaba pynpaw ïa ka jingkmen ba u ïoh ban pynïasoh bad ka East Bengal u la ong, “Nga dap da ka jingkmen kaba khraw ban shah thung kum u head coach ka kynhun na bynta arsnem. Ka long kaba sngewtynnad ban don bynta bad ka kynhun kaba la don ïa ka history kaba jrong bha ha ka phutbol bad khur ruh shibun ki khusnam ha ka phutbol ha India.”
