Kular ka DC West Karbi Anglong ban weng noh ïa ka Khyrdop bad Pulit ha Khanduli

Khanduli, Ïaïong 24: Da ki spah ngut ki paidbah, kynthup ruh ïa ki nongïalam Shnong na Khanduli, Saitsama, Namdong bad kiwei kiwei bad kumjuh ruh ki Sengbhalang na Jaiñtia Hills ki la hiar sha Khanduli ban dawa weng noh ïa ka Khyrdop lum pisa bad ka ktem Pulit jong ka Karbi Anglong Autonomous Council (KAAC) bad lyngba kane ka jinghiar jong ki, ki bor synshar District jong ka Karbi Anglong ki la kular ban weng noh ïa kane ka Khyrdop bad kumjuh ruh ïa ka Ktem Pulit.
Ha shuwa ban tur sha katei ka khyrdop, la pynlong ïa ka Peace Rally ha Madan Phutbol Khanduli ba la pynïaid da u Waheh Shnong Khanduli, u Bah Y. Nongspung ha kaba la ïoh ïa ka jingkren na ki nongïalam ka Seng KSU, JSM, HANM, HBDRF, ENJC, HYC bad kiwei kiwei.
Hadien kane ka jingïalang, ki nongïalam Shnong bad ki nongïalam Sengbhalang ki la tur sha ka jaka ba don ka khyrdop lum khajna, ha kaba la don lang ruh ki Magistrate na West Jaiñtia Hills District,ki heh Pulit bad kumjuh ruh ka DC jong ka West Karbi Anglong District bad ki heh Pulit.
Ha kane ka jingleit tur jong ki, ka la don ka jingïakren ha surok hapdeng jong ki bad ki bor District ka West Karbi Anglong. Na ka liang ki nongïalam Shnong bad ki nongïalam Sengbhalang, ki la pynpaw ba kane ka jaka ba ka KAAC ka la buh ïa ka Khyrdop kadei kaba hap ha ka jaka jong ka Meghalaya bad pynpaw ruh ba ka Block I kadei kaba hap ha Meghalaya shuwa ka Notification jong ka snem 1951.
Ki la pynpaw hakhmat ki bor synshar ka West Karbi Anglong District ba ka jingbuh ka KAAC ïa kane ka Khyrdop lum khajna ka la ktah shibun ïa ki paidbah khamtam ïa ki nongrep. Ki la pynpaw ruh ba kane ka jinglum khajna kam ktah tang ïa ki paid Khasi, hynrei ka ktah ruh ïa ki paid Karbi namar ba ki hap ban ïakhaïi pateng hapdeng ki Khasi bad ki Karbi ba shong ha katei ka thaiñ.
Shuh shuh, ki la pynpaw ba kine ki kynhun jaidbynriew kidei hi ki para riewlum ba la ïashong ïasah kum shipara wat ha kiwei de ki bynta jong ka jylla Meghalaya ruh. Kumta ki la dawa na ka DC, ka Krishna Buruah ban bthah ïa ka KAAC ba kan weng noh ïa kane ka Khyrdop bad kumjuh ruh ban weng noh ïa ki Pulit kiba don ha katei ka jaka.
Hadien ka jingïatai kaba la neh slem bha, na ka liang ka DC, ka la kular ban phah weng noh ïa kane ka khyrdop bad kumjuh ruh ïa ka ktem Pulit na Khanduli khnang ban wanrah biang ïa ka jingïashong suk shongsaiñ ha katei ka jaka.
Na ka liang ki nongïalam Shnong bad ki Sengbhalang,ki la pdiang ïa kane ka jingkular ka DC bad ong ruh ba kin ap mynta katto katne sngi la kane ka kular kan long kam ne em. Hynrei lada kam long kam kin sa ïakynduh biang.