Da kawei ka sur pynpaw ki District Council ïa ka jingpyrshah lada pyntreikam ïa ka UCC

Shillong, Ïaiong 24: Ki la tylli ki Autonomous District Councils (ADC) kiba don ha ka jylla da kawei ka sur ki la rai ban pyrshah ïa ka jingthmu ka sorkar pdeng ban pyntreikam ïa ka Uniform Civil Code (UCC) ha ka ri baroh kawei.
Na ka liang ki lai tylli ki ADC kiba don ha ka jylla ki la rai ban pass ïa kawei Resolution ban pynpaw ïa ka jingbym ïahap bad ka jingthmu ka sorkar pdeng.
Ïa kane ka rai la shim ha ka jingïalang jong ki Chief Executive Members (CEM) jong ki lai tylli ki ADC kiba don ha ka jylla kata ka Khasi Hills Autonomous District Council (KHADC), Jaiñtia Hills Autonomous District Council (JHADC) bad Garo Hills Autonomous District Council (GHADC) ïa kaba la pynlong ha Shillong ha ka sngi Nyngkong.
“Ngi la rai ban pass kawei ka Joint Resoultion ba kynhtup lang ïa baroh lai ki ADC bad kumjuh na ka liang kine ki ADC kiba don ha ka jylla kin mynjur nalor kane sa kawei pat ka Resolution kaba kin jynjur la ka jong ka jong,” ong u CEM ka KHADC u Bah Titosstarwell Chyne haba kren sha ki lad pathai khubor.
U la ong ba da kane ka Resolution yn dawa na ka sorkar pdeng ba kan pynlait ïa ka jingpyntreikam ïa kane ka aiñ ha ki jaka ba hap hapoh ka jingpeit jingkhmih jong ki District Council.
“Lada pyntreikam ïa kane ka UCC kan don ka jingktah kaba jur ïa ka jingtreikam jong ki District Council bad ïa ki riti dustur bad ïa ki jaidbynriew hi baroh,” u la ong.
“Ki bun bah ki jingktah bad ki jingïatyngkhuh lada pyntreikam ïa ka UCC namar ynda pyntreikam ïa kane ki aiñ baroh kiba la ju don kin ïap noh hynrei yn treikam salonsar tang da kawei ka aiñ ban pynkhreh na Delhi la ha kaba ïadei bad ka kyntiew kurim, ka rukom hiar pateng, ha ka niam ka rukom bad kiba bun bah, na kata ka daw kum ki riewlum ngi sngew ba ngin ym lah satia ban pdiang ïa kane,” u la bynrap.
U la ong ba kumba ki lai tylli ki ADC ki la pas ïa ka Resolution ha kaba ïadei bad ka CAB ha kato ka por kan dei da kajuh ka rukom ruh ha kaba ïadei bad ka UCC.
“Ngi la pyllait ïa ki jaka ba hap hapoh ki jylli ki ADC na ka jingtreikam ka CAA bad ngi kwah ruh ba kan long kumjuh ïa kane ka sorkar UCC,” u la ong.
U la ong ba na ka liang kine ki ADC kin sa lum ïa ka Dorbar kyrpang ban pass ïa kane ka Resolution ha kine ki khyndiat sngi ban wan.
Ha kawei pat ka liang u la ïathuh ruh ba ha kane ka jingïalang la ïatai ha kaba ïadei bad ka jingpan jingmut ka sorkar pdeng ha kaba ïadei bad ka jingthmu ban pynkylla thymmai ïa ka Sixth Schedule.
“Ngi ïohi ha ka jingtyrwa ban pynkylla la thmu ban bsut ïa ka kyntien unrepresented tribe ne ka jingthung MDC da na kiwei pat ki jaidbynriew bym dei Khasi ne garo ha ki ADC bad na ka liang jong ngi ngi la pyrshah jur ïa kane ka bynta,” ong u Bah Titos.
U la ong ha kaba ïadei bad ka jingtyrwa ban wanrah da ki Village Council na baroh lai tylli ki konsil ki sngew ïahap ba dei ban wanrah da ka Village Development Council. “Lada wanrah da ki Village Council kan don jingïatyngkhuh bad ki Dorbar Shnong bad ki rukom synshar tynrai jong ngi na kata ka daw ngi ai jingmut ba dei ban wanrah da ki Village Development Council bad ha ka jigilang ngi la ïathuh ruh ba ka KHADC ka la wanrah ïa ka Village Development Council Bill ha kaba ïadei bad kane,” ula ong.
U la ong ba ha kaba ïadei bad kiwei pat ki jingtyrwa pynkylla na ka liang ka konsil kam don kano kano ka jingpyrshah.
Shuh shuh u la ong ba ha kane ka jingïalang la ïatai ha kaba ïadei bad ka jingai syrnot Scheduled Tribe da ka ophis ki Deputy Commissioner bad u la ong ba ha ka jingïalang la rai ban dawa na ka sorkar ba kadei ban pynphai biang noh ïa ka jingai synrot Scheduled Tribe sha ki District Council namar kane ka dei hapoh ka jylli treikam jong ki.
“Ngi la rai ruh ba ka ophis ki DC ba ki dei ban pan jingpynskhem shuwa na ki District Council haba ki thmu ban ai ïa kino kino ki Permanent Residential Certificate,” u la ong.