Shillong, Jymmang 14: Ka Election Commission of India (ECI) ka la pynbna ba ïa ka Jylla Meghalaya yn kynthup hapoh ka Bynta-III jong ka Special Intensive Revision (SIR) ïa ki Electoral Roll kaba la pynlong ha ka ri baroh kawei.
Ïa ka por jong ka SIR ka Bynta-III la buh da kaba pyrkhat ïa ki bor ba ïadei lang ryngkat bad ka jingpynrung kyrteng katkum ki ïing ha ka khanasamari kaba dang ïaid shakhmat.
Katkum ka jingbuh por ba la pynbna da ka ECI, ïa ka kam pynthymmai ha Meghalaya yn sdang da ki kam pynkhreh bad ki jingai jinghikai naduh ka 20 tarik Jylliew haduh ka 29 tarik Jylliew, 2026, katba ki Booth Level Officer (BLO) kin pynlong ïa ka jingpynshisha da kaba leit sha man ki tyngkong ïing naduh ka 30 tarik Jylliew haduh 29 tarik Naitung 2029.
Ïa ka draft electoral roll na ka bynta ka jylla Meghalaya la buh por ban pynmih ha ka 5 tarik u Nailar 2026, hadien kane lah ban ujor ïa ki jingkam bad ki jingpyrshah haduh ka 4 tarik u Nailur, ïa ka thup kyrteng ba khatduh yn pynmih ha ka 7 tarik u Risaw 2026.
Yn pyntreikam ïa kane da kaba pyndonkam ïa ka 1 tarik Risaw, 2026 kum ka tarik ba la buh na ka bynta ka jylla Meghalaya bad katto katne kiwei pat ki jylla kiba don ha ka Bynta-III.
Katkum ka jingkheiñ ba la pynmih da ka Commission, ka jylla Meghalaya mynta ka don 23,43,252 ngut ki nongthep vote. Ban pynlong ïa kane ka kam pynthymmai, yn buh 3,551 ngut ki Booth Level Officer ha kylleng ka jylla.
Ha ka ri baroh kawei, ka Bynta-III jong ka SIR kan kynthup ïa 16 tylli ki Jylla bad 3 tylli ki Union Territory kiba don palat 36.73 klur ngut ki nongthep vote. Palat 3.94 lak ngut ki BLO bad 3.42 lak ngut ki Booth Level Agent kin ïashim bynta ha kane ka kam.
Ka Election Commission ka la batai ïa ka SIR kum ka kam kaba ïashim bynta lang kaba kynthup ïa ki nongthep vote, ki seng saiñ pyrthei bad ki ophisar ba dei peit ïa ka kam elekshon, bad la kyntu ïa ki seng saiñ pyrthei ban thung ïa ki Booth Level Agent ha man la ki jaka thep vote khnang ban pynthikna ïa ka jingïashim bynta kaba shai bad kaba kham ïar ha ka kam pynthymmai.
Ka Commission ka la ong ruh ba ïa ka jingbuh por na ka bynta ka Himachal Pradesh, Jammu & Kashmir bad Ladakh yn sa pynbna kham hadien, hadien ba la pyndep ïa ki kam ba ïadei bad ka khanasamari bad bishar bniah ïa ka jinglong ka suiñbneng ha ki jaka lum bad ki jaka sop thah.
