Ki Nongïalam Balang bad ki Pastor kim dei ban shah ïalam bakla ha ki social media : Samlin Malngiang

Shillong, Ïaiong 24 : U kyrtong ka NPP na Sohiong, Bah Samlin Malngiang ha ka sngi Nyngkong u la pynshai ba ki khubor kiba phriang ha ki social media kiba kynnoh ba u kren pyrshah ïa ki nongïalam balang ki dei ki bym don nongrim satia.
Haba kren bad ki lad pathai khubor, u Bah Samlin u la ong ba kitei ki video kiba la thad ha social media kidei kiba la shu ring tuh da mano re bad u la kynnoh ruh ba kito kiba pynphriang ki khlem pyni lut ïa ka jingkren jong u kumba ka long.
Shuh shuh u la ong ruh ba lada sngap bha ïa ka video kam shym la don satia ka jingkren pyrshah ïa ki nongïalam Balang. “Kim shym la pyni lut ïa ka jingkren jongnga hynrei ki la shu ot tang khyndiat ban pynphriang ha ki social media,” ong u Bah Samlin.
Utei u kyrtong u la ong ruh ba kum ki nongïalam niam kim dei satia ban ngeit ne shah ïalam bakla ha kitei ki khubor kiba saphrang ha ki social media kiba thmu ban pynthoh bria ïa u ha kane ka elekshon.
Shwa kane, u la ong ruh ba naduh ba u sdang ban ïakhun elekshon ki la mih shibun kiei kiei kiba thmu ban pynthohbria bad pynjah burom ïa u hynrei kim shym la lah satia ban pynkhyllem ïa u tad haduh mynta.