Ngan ïasaid ha ka Cabinet halor ka Roster ym ban shu pyrta ha surok : Paul

Shillong, Iaiong 24 : U Myntri ka tnad Kam Jngohkai pyrthei bad Art and Culture u bah Paul Lyngdoh u la ong ba ïa u la jied ban ïasaid hapoh ka Kynhun Myntri ne Cabinet halor ka jingpyntreikam ïa ka Roster System ym ban leit pyrta sha surok.
“ ïa nga la jied ba ngan ïasaid hapoh ka Kynhun Myntri (Cabinet) halor ka jingpyntreikam ïa ka Roster System ym ban leit pyrta sha surok. Namar ngi kum ka UDP ruh ngi ïeng ha ka nongrim ban dawa ba dei ban pyntreikam ïa ka Roster nangne shakhmat ym naduh ba pyntreikam ïa ka Reservation Policy” ong u bah Paul.
U la pynkynmaw ruh ha u 2009 mynba u long myntri ha ka sorkar ba ïalam da u Dr D.D Lapang, ki don saw tylli ki post kiba ym pat lah ban thep ha ka tnad Labour kaba la bat da u Dr Mukul Sangma ha kato ka por ba u long u Symbud Myntri Rangbah. Ha katei ka por u bah Paul u la ïakren bad u Dr Mukul Sangma ban thung ïa ki saw tylli ki post Labour Inspector kiba ym pat thung namar bym don ki Garo kiba pass hynrei u Dr Mukul um treh namar u ong ban ap beit na ka bynta ki Garo. Hadien kane u Dr D.D Lapang u bate kam thymmai ïa ki myntri jongu bad u la ai noh ïa ka tnad Labour ha u bah Paul bad hadien katei tang hadien shitaiew u bah Paul u la thung briew ha kitei ki post kiba thylli. Kine ki Post ki dei ki Labour Inspector bad kat kum ki kyndon kane ka list ka la dei ban kut por ( lapse) noh sa tang shitaiew hynrei shwa ka tei u bah Paul u la ïoh ban pyndep ïa ka kam.
Dei halor kine ki nongrim ba u bah Paul u ong ba u leh da ki kam ym tang da ka ktien ban shu ïa pyrta ha surok. Kum u Myntri sorkar ruh u la hiar shuki na ka Cabinet ha u snem 2005 halor ka issue MBOSE bad ka sorkar ka la hap ban pynbeit ïa ki kynrum kynram ha ka MBOSE bad ba ïa ki answer script la ïoh ban pynbeit beit haduh mynta hangne ha nongbah Shillong ym shuh sha Tura, Garo Hills kumba long mynshwa.