Shillong, Iaiong 24: U kyrtong ka Trinamool Congress (TMC) na Sohiong constituency u bah Stoding Thabah hynne ka sngi ula pynrem jur ïa u kyrtong ka National People’s Party (NPP) u bah Samlin Malngiang halor ka jingkynnoh ba u kren tohmet ïa ki Nongïalam Niam.
Lah ban kdew ba ha kine ki sngi, ka video ka la saphriang ha ki rynsan Social Media ba u kyrtong ka NPP bah Samlin Malniang ula kren tohmet ïa ki nongïalam niam, da kaba ong ba ki long tang ki nongbatai ym ki nongleh.
Halor kane, u bah Stoding ula ong ba kum ka party kam sngewïahap ïa kane ka jingkren une u kyrtong ka NPP ïa ki nongïalam niam.
U bah Stoding ula kynnoh ruh ba u kyrtong ka NPP u bah Samlin Malniang ula kynnoh ba ki nongïalam niam, haba sma bang ki jyntah ki klet noh ban duwai bad dei namar kane ki dei tang ki nongbatai ym ki nongleh.
Shuh shuh ula ong ba haba ïalap elekshon, ka ju don ka jingïatyngkhuh bad ki nongïalam niam, ki Balang bad ki seng saiñ hima sima hynrei kam ïahap satia ban shu kren tohmet noh ïa ki nongïalam niam.
Nalor kane u kyrtong ka TMC u bah Stoding Thabah u la ong ba ka la donkam ka jingkylla bad u don ka jingkyrmen ba ki paidbah ka Sohiong ki dei kiba stad bad shemphang ban jied ïa ka TMC ha kane ka ilekshon.
