Ai jingkheiñ kaba biang thik thik halor ka bhah khajna na ki mar poh khyndew dawa ki 3 ADC
Shillong, Iaiong 24 : Ki lai tylli ki Autonomous District Council (ADC)-ka Khasi Hills Autonomoud District Council (KHADC), Jaintia Hills Autonomous District Council (JHADC) bad ka Garo Hills Autonomous District Council (GHADC) mynta ka sngi ki la dawa ba ka Sorkar Jylla ka dei ban ai a ka jingkheiñ ba biang thik pa thik ïa ki bhah jong ki na ki khajna marpoh khyndew (minor & Major) bad ka khajna kali (motor vehicle tax).
Haba pyntip ïa kane hadien ka jingïalang jong ki lai ngut ki CEM, u CEM jongka KHADC u Bah Titosstarwell Chyne haba ïakren bad ki nongthoh khubor ula ong ba ki lai tylli ki ADC ki la ïakren ïa ka kam ba ïadei bad ka pla tyngka jong ki lai tylli ki ADC.
“Ngi kyntu ïa ka Sorkar Jylla ba lada long kumno kumno ruh ban ai ïa ka jingkheiñ ba biang thik pa thik haba ïadei bad kane ka bhah khajna ba ngi dei hok ban ïoh” ong u Bah Titos.
“Ngi ju ïoh ïa ka bhah na ka Sorkar Jylla kum ka minor bad major mineral bad ka motor vehicle tax. Hynrei sngewsih ba ha baroh kine ki snem, ngim ju ïoh ïa ka jingkheiñ kaba beit ba haduh katno ka bhah jong ngi ka dei ban long, ngi shu ïoh katba ai ïa ka bhah” ula bynrap.
Haba kyntu ïa ka Sorkar ban pynïoh kham bun ka pisa sha ki 3 tylli ki ADC, u Bah Titos ula ong “Ngi kyntu ïa ka Sorkar Jylla ban pynïoh kham bun ka pisa ïa ki ADC khamtam kum na plan scheme, bad kiwei kiwei ki jingïarap song pisa”.
Nalor kane, u CEM ka KHADC ula ong ba ki 3 ADC ki la ïakren ruh halor ka jingslem jong ka Sorkar ban pyllait ïa ka song pisa 15th Finance Commission ba ai da ka Sorkar Pdeng bad kyrpad ban pyllait noh ïa ka song pisa hapoh ka por ba dei.
“(Ngi) kyntu ia ka Sorkar ban pyllait ïa ka pisa jong ngi hapoh ka por ba biang namar ka jingpynslem ban pyllait ïa ka pisa ka lam sha ka jingslem ban pyntreikam ïa ka skhim. Ka Sorkar Pdeng ka ju pynbor ïa ngi ban aiti ïa ki Utilization Certificate (UC) hynrei ngim lah ban ai ïa ki UC jong ngi hapoh ka por namar ngi ruh ngim shym la ïoh ïa ka song pisa hapoh ka por bala buh” ula ong.
Kat kum ka jingong jong u, ki lai tylli ki ADC haduh mynta kim pat ïoh satia ïa ka song pisa ba ïadei bad ka Untied Scheme jong u snem 2021-2022 bad 2022-2023.
“Namar kata, ngi kwah ban kyntu lang ïa ka Sorkar Jylla ban khmih ba kum kine ki jingpynslem ha ka jingpyntreikam ïa ki skhim kam dei ban jia satia” ula bynrap.