Shillong, Nailar: Ka Reliance General Insurance Co. Ltd. (RGICL) kaba long ka kompany ba pawnam ha India ha ka liang ka jingai jingshakri ha kaba ïadei bad ka jingbuh insurance ka la ïoh pdiang ïa ka jingpynkup bor na ka bynta ban pyntrei kam ïa ka Megha Health Insurance Scheme (MHIS) bad ka Ayushman Bharat Pradhan Mantri Jan Arogya Yojana (AB-PMJAY)-Phase 6 ne ka bynta ba 6 ha ka jylla Meghalaya ïa kaba la ai bor da ka tnad Health and Family Welfare, ka sorkar Meghalaya.
ïa kane ka jingai bor la ïoh pdiang hadien ka jingïakhun ïa ka bidding ne ka jingbuh dor, ha kaba ka RGICL ka la long ka nongjop ïa ka jingïakhlieh dor ha kaba ka la ai ïa ka dor kaba long ka jingïakhun bad kiwei pat kiba ïakob. Ka sorkar Meghalaya ka la rai ban pynthymmai ïa ka jingïoh myntoi ne ki Health Benefits Package bad kiwei kiwei ki bynta ha ka Insurance Contract jong ka MHIS 6 bad mynta ka la rai ban pyntreikam noh ïa ka MHIS 6 scheme ryngkat ka jingïatreilang bad ka PMJAY, ka ban ai ïa ka insurance kaba palat T. 5,30,000 na ka bynta baroh ki dkhot kiba hap ha kawei ka long bad kiba dei hok ban ïoh myntoi.
Kane ka jingïakut ne ka contract kan kynthup haduh palat 7 lak tylli ki longïing ha Meghalaya, ha kaba kin ïoh ïa ka pisa ban pynlut na ka bynta ka pang ka shitom ne health insurance ka ban long na ka bynta ka jingleit thiah pang jong ki ha ki hospital, ban leit shim dawai, ban leh ïa ki test ne diagnostic tests, bad ban leit shim dawai biang hadien habud.
Ka RGICL ka trei radbah na ka bynta ban ai ka jingshakri ba bha tam ha ka liang ka koit ka khiah sha ki nongshong shnong ka Meghalaya lyngba ki hospital ba la jied bad ki jaka ai jingsumar kiba don ha kylleng ka jylla. Ka RGICL kan pyrshang ruh ban pynkhlaiñ ïa ka jingtreikam jong ka lyngba ka digital bad kiwei kiwei ki lad ai jingsumar ba thymmai ban pyntikna ba ka jingpynrung kyrteng jong ki briew na ka bynta kane kan long kaba lait na ki kynrum kynram, ban pynsuk ban ïoh ïa ka pisa, bad ban ïarap ban pynbeit ïa kino kino ki jingeh ba ki nongïoh myntoi ki ïakynduh.
U Rakesh Jain, CEO jong ka Reliance General Insurance, u ong, “Ngi sngew tynnad shibun ban ïoh ban ïatreilang bad ka sorkar Meghalaya ha kane ka sienjam treikam kabab ha na ka bynta ban pynïoh ïa ka jingsumar ba salonsar ïa ki nongshong shnong ka Meghalaya hapoh jong ka Megha Health Insurance Scheme bad Ayushman Bharat Pradhan Mantri Jan Arogya Yojana (AB-PMJAY)-Phase 6. Ngi ngeit skhem ba da ka jingïoh ïa kane ka contract, ngin lah ban ai jingkyrshan ïa ka jylla ban pynduna ïa kata ka jingeh ha ka liang ka jingbym ïoh ïa ki lad ai jingsumar ha ka thain, bad ha kajuh ka por ban nang pynkhlaiñ shuh shuh ïa ka jingpynsaphriang jingtip shaphang ka health insurance bad kumjuh ruh ban pynkhlaiñ ïa ka jingdon jong ngi ha ka thaiñ shatei lammihngi.
