Nongstoiñ, Naiwieng, 15: Ka jingpynrung kyrteng ïa ki nongthep vote kiba thymmai kiba la kynjoh 18 snem kan long haduh ka 1 tarik jong u bnai ba nyngkong 2023. U Electoral Registration Officer ka West Khasi Hills, u la pyntip paitbah ba ka jingpynrung kyrteng ïa ki nongthep vote ba thymmai kan long na ka bynta ki lai tylli ki constituency, kata ka 32 Nongstoiñ, 33 Rambrai Jyrngam bad ka 34 Mawshynrut constituency.
Nalor kata u la pyntip paitbah ruh ba na ka bynta ka jingpynbeit ïa ki jingbakla kyrteng ne spel dak ha ki electoral roll, ki don ki form 6, 6A bad 6 B lane ki form 7 bad 8 kiba ki hap ban pyndap bad ka tarik ba khatduh ban pdiang ïa kitei ki form kan long haduh ka 8 tarik Nohprah 2022. Katba ka ophis kan pdiang ha baroh ki sngi long trei lane ki lah ruh ban leit ïakynduh ïa u Electoral Registration Officer/Assistant Electoral Officer lane ban phah ïa ki form lyngba ka post office ha ka por ba biang.
Nalor kata u la pynbna ruh ba na ka bynta ki samla ki ban sa kynjoh 18 snem ha ka 1 tarik April 1 tarik July bad 1 tarik October 2023, ki lah ban pynrung kyrteng lypa da kaba pyndap ha ka form 6.
