Rakhe dap 21 snem bad pynthymmai ïa ki nongkitkam ka KSU Phlangdiloiñ Area Unit

Mawkyrwat, ‘Naiwieng, 15: Ka Khasi Student’s Union (KSU) jong ka Phlangdiloiñ Area Unit ha kane ka sngi saitjaiñ jong ka taïew ba la dep ka la ïoh ban rakhe ïa u maw-mer jong ka jingdap 21 snem ha ka jingïaid lynti ha ka jingshakri jong ka ïa ka dong ka thaiñ, ka ri bad ka jaidbynriew baroh kawei ha kaba u bah Lambokstarwell Marngar, President KSU Central Body u la long kum u kongsan.
Haba kren ha ka jingïalang, u bah Lambokstarwell Marngar, President ka KSU Central Body u la ong ba ha ka jingrakhe jong ka jingdap 21 snem ka KSU Phlangdiloiñ Area Unit ha ka jingshakri jong ka na ka bynta ka dong ka thaiñ bad ka jaidbynriew ka pynkynmaw ba kum ki nongïalam ha ka jingïaid lynti jong ki kim shym la ïaid ha ka lynti kaba jlieh hynrei ki la ïaid ha ki lynti kiba eh bad kiba khoh-ruh khoh-ram ryngkat ka jingtyrha haba ki tynrong ïa ka lyngkor kaba khia na ka bynta ka dong ka thaiñ bad jong ka ri bad ka jaidbynriew. U la ong ruh ba ymdei ban klet pat ïa ki jingaimynsiem bad ki jingpynshlur wat na ka liang ki kmie ki kpa bad kiba ha ïing ha sem jong baroh ki dkhot ha ka jingïaid lynti jong ki.
Kumta lyngba kane ka sngi, u sngewbha khot ym tang ïa ki nongïalam jong ka KSU hynrei ïa baroh ki dkhot jong ka jaidbynriew ba kin long ki nongtei thymmai ban pynthikna ba ka jaidbynriew kan skhem bad kan neh khnang ka ban long ka stieh ban ïada bad ban ïa khun pyrshah ïa ki bor kiba nabar kiba wan ban thombor ïa ka ri bad ka jaidbynriew. “Lada ngi shuh sah kut ha kata ka jingïakynad, jingïakdewkti, ka jingïatharai sniew bad ka jingïakhwan myntoi shimet ka dei kata ka lynti ba ngin plie pynban ïa ka jingkhang ban ailad ïa ki nongwei ba kin pynïaid bad shynshar ïa ka jaidbynriew jong ngi”, ong u bah Lambok.
U la ong shuh shuh ba ka jaidbynriew haduh kine ki sngi ki don beit ki nongshet kylla, hynrei la kren bunsien shaphang kata ka rai-bi jong ka jaidbynriew kaba dang tyllun haduh mynta mynne da kaba pynrem jur ba kiba shong ha Secretariat, kaba long ka jaka treikam ba ha khliehduh jong ka sorkar Jylla hynrei mynta pat, “La shynshar da ki ‘boss’, ym da ki nongïalam kiba shisha (leaders)”, u la ong. Kane ka jingkren jong u ka long halor ka nongrim ba ha kine ki 40 snem tam, ki nongïalam ka KSU lem bad kiwei kiwei ki nongïalam sengbhalang ki la pyndep ïa la ka jong ka kamram da kaba ki ju pynsngew sha ka sorkar halor kiba bun ki mat kynthup ha kaba ïa dei bad ka koit ka khiah, ka ïoh kam ïoh jam bad ka pule puthi, hynrei kaba sngewsih ka long ba haduh mynta ym pat ïohi ïa kano kano ka policy treikam kaba lah ban wanrah jingmyntoi ïa ki samla pule hapoh ka jylla Meghalaya.
Namarkata, u la buh ka jingkyrpad ïa baroh ba long ki briew kiba husiar bad kiba kyndit thiah da kaba kin sngewthuh ïa la ka jong ka jinglongtrai ha ka khyndew ka shyiap bad ban sngewthuh ruh ïa ka jinglong ba kyrpang ïa kaba naduh ki longshwa manshwa ki la ai ha ngi. “Katba dang nang dang stad, ka don pat jinghiar dor ha ka akor ka burom, khamtam ka jinghiar ar sut jong ka jingkitkhlieh na ïing na sem bad ka jingkitkhlieh ha ka imlang ka sahlang bad ka jingïap ruh ha ka jingkitkhlieh ïa ka ri bad ka jaidbynriew”, ong u bah Lambokstar.
Ha kajuh hi ka sngi kum ka unit ka la ïoh ruh ban pynthymmai ïa ki nongkitkam jong ka ha kaba u kongsan u la ïoh ban pyntian smai ïa ki nongkitkam jong ka samoi treikam 2022-2025 bad la jied President ïa u Batkupar Imiong, Vice President u Middleton Basaiawmoit, General Secretary u Banrapbor S. Lyngdoh, Assistant Secretary u Johnveny Syiemiong, Organising Secretary u Shembok Marshra, Assistant Oranising Secretary u Teibor Nonglang, Finance Secretary u Drepstarwell Thongni, Assistant Secretary u Rangkynsai Syiemiong, Publicity Secretary u Silvester Imiong, Assistant Publicity Secretary u Pynraplang Thongni, Sports Secretary u Willgeorge Syiemiong, Assistant Sports Secretary u Pauljenstar Nonglang, Education Secretary u Bigest Thongni, Assistant Education Secretary u Pyndaplang Marshra, Environment Secretary u Gentle Syrman, Discipline Secretary u Markus Iawphniaw bad kynthup ruh ïa ki 6 ngut ki dkhot.
Kiba ïadonlang ha kane ka sngi ki long u bah B.S. Lyngdoh, President ka Langrin Youth Warfare Association kum u symbud kongsan, u bah Iashanborlang Mukhim, Asst. Organising Secretary ka KSU Central Body, u bah Forwardman Nongrem, President ka KSU South West Khasi Hills District, ki Nongïalam ka KSU Umdohlun Circle, u Syiem Khynnah ka Hima Langrin, ki Nongïalam Shnong bad ki ‘riew Rangbah jong ka dong ka thaiñ.