Nongstoiñ, Naiwieng, 15: Namar ka jingpynsahteng jong ka sorkar ban phah maramot ïa ki katto katne ki surok kiba don hapoh ka sor Nongstoiñ kiba rung sha ki kyntoit shnong, mynta ka sngi ki nongïalam ka Hynñiewtrep Youth Council New Nongstoiñ Unit hapoh ka jingïalam jong u samla Wilson Myrthong President, ki la leit ban ïakynduh ïa u bah F.Sohlang Executive Engineer ka PWD Nongstoiñ Division, ban pynkynmaw biang ïa u halor ka jingthoh kaba ka seng ka la leit buh ha u Executive Engineer ba mynshuwa, na ka bynta ban kyrpad ïa u ba un ïarap lem, ban pynsgew sha ka sorkar ba kan phah maramot ïa kitei ki surok kiba la jot ba ki paitbah kin lait na ki jingeh.
Ha katei ka jingleit ïakynduh jong ki u bah Sohlang u la ong ba na ka bynta ban maramot ïa ki surok hapoh ka sor Nongstoiñ, ka sorkar ka la ïoh jingïarap pisa na ka World Bank bad shen kan sa mang pisa na ka bynta ban maramot ïa baroh ki surok kiba la jot hapoh sor Nongstoiñ. Ha kajuh ka por u la kular ba un sa buddien ha kaba ïadei bad katei ka mat bad lada ka sorkar ka la khot tender bad sam jingtrei sha ki kontraktor, un ïaleh katba lah ban kyntu ïa ki kontraktor ba kin pynsted ïa kam.
