Jowai, K’Lyngkot 06: Ka jingïalang bala pynlong mynta ka sngi ha Conference Room jong ka ophis treikam u Deputy Commissioner ka West Jaiñtia Hills District, na ka bynta ban pynbeit ïa ka rukom lum khajna na ki kali ki mator kiba ïaid lyngba ka Toll Gate Ialong/Pasyih hapdeng ki nongïalam jong ka seng ki nongñiah kali kamai ka All Jaiñtia Commercial Vehicle Association (AJCVA), ka Jaiñtia Student Movement (JSM), ki nongmihkhmat na ka shnong Ialong bad ki nongtrei ka NHAI.
Ha kane ka jingïalang kila poi biang sha ka jingïakut ban pynneh shwa kumba ju long ba ki trai kali napoh ka West Jaiñtia Hills District kim donkam ban siew khajna haba ïaid lynti lyngna ka katei ka Toll Gate kaba don ha Ialong/Pasyih.
Ïa kane ka jingïalang la pynïaid da u ADC ma M.A Challam bad na ka liang kitei ki nongïalam jong ka seng nongñiah kali kamai bad ka seng JSM kila pynsngew kumba long mynta ka jinglong jingman jong ka Surok ka NHAI naduh Thadlaskeiñ ter ter haduh ka shnong Ratacherra East Jaiñtia Hills ula shisha u surok uba sniew shaba palat bad kane kala pynshitom ïa ka leit ka wan jong ki paidbah.
Halor kane ka jingsniew jong ka surok NH kila kynthoh jur ba kane ka jingleh bad ka jingbym shimkhia jong ka NHAI ïa ka jingkular ban maramot ka long kumba lehbeiñ ïa ki paidbah ym tang ïa ki nongñiah kali trai jylla hynrei wat kiwei de ki jylla jong ka thaiñ (North East) kiba ïaid lynti na kane ka surok.
Kila pynsngew ruh “ynda la mad ki jingïakhih pyrshah ïa kitei ki Toll Gate kiba doh hapoh ka Jaiñtia Hills la ïoh jubab pynban na ka NHAI ba dei da ka daw ka jingjur palat u slap kaba la wanrah ïa ka jingtwa ki lum ki wah kaba la pynsniew ïa ka surok”.
Shuh shuh kitei ki seng kila pynsngew ruh naduh u snem ba la dep jong ka aiom slap haduh mynta na ka liang ka NHAI kam shem la leh eiei ïa ka jingmaramot kaba paka hynrei kala shu eh sah shah khlem jingpyrwa eiei ïa ka eh ka shon jong ki paidbah, wat ïa ki bynta ba ki bor District kila dep dawa pynbha ïa ki bynta ba donkam ha Ialong na ka liang ka NHAI kam shem la pyndep haduh mynta.
La pynsngew ruh ba ka Toll Gate kaba don ha Ri-Bhoi bad kumjuh Lumshnong EJH kim shem la lum khajna ïa ki kali jong ki trai kiba dei na kitei ki District la ong ba ïa kane ka juh dei ban pyntreikam ha Toll Gate kaba don ha Ialong/Pasyih.
Halor kane ka nongrim kitei ki seng nongñiah kali bad ka JSM ki la kreh shai ha kane ka jingïalang da kaba shim ïa ka rai ba lada ka NHAI kam pat lah ban pynbha pynmiat ïa ka surok da kaba janai ïa ki paidbah bad kumjuh ïa kiwei de ki jingdonkam dei ban pynneh shwa ïa ka jingïakut kaba rim kata ban nym siew khajna katba ka NHAI kam pat leh ïa kaba donkam.
