Shillong, K’lyngkot: U Bah Cornelius Kharkongor rangbah shnong ka Mawlai Mawtawar u la pynïasyriem ïa u MLA ka Mawlai u bah PT Sawkmie ba u long kum u Lionel Messi u khlur ïalehkai phutbol ka Argentina ha kaba ïadei bad ka jingtrei shitom jong u.
U Bah Cornelius u la khlei ïa kine ki kyntien ha ka jingïalang plie ïa ka surok ha dong Riattamdong, Mawtawar ha ka 05 tarik u Kyllalyngkot, 2023 ha ka jingdon ryngkat ki rangbah dong jong saw tylli ki dong ka Mawtawar, ki paidbah bad kiwei kiwei.
Ula ong ba ka Argentina ka shaniah bha ïa u Messi, uba thep kol jan man ki jingïakhun, ki ruh ki long kumjuh kumba long ka Argentina, ki shaniah ha u bah PT Sawkmie uba dei u Messi, uba la pynjop ïa la ka ri.U la pynkynmaw ba ha kato ka sngi ba u peit ïa ka final jong ka World Cup u la lynga bha haba iohi ïa ka jingtbit u Kylian Mbappe, sa ban kut artad ka jingïakhun ban da rung ka kol u Mbappe la rem ka Argentina.Hynrei ha ka tie breaker u Messi uba shut nyngkong u la ai ka jingkyrmen ïa baroh kawei ka kynhun, naba u dei uba la ih bha bad ubym shim sting ïa ka ka jingïalehkai bad uba trei shitom.
Nalor kata u la ai mynsiem ia u Bah PT Sawkmie ba un ym lip rong bad ban nym artatien bad u la ai syrnot ïa u ba u long uba trei shitom bad basuk ban ïakynduh. Kumba long u Messi uba la pynjop ïa ka kynhun, ma ki ruh ha Mawlai ki ñiew ïa u ba u dei uta u Messi, bad lada ka bakla ka Mawlai ka la pheil, naba ki ïohi ïa u kum uwei u nongïalam ba shitrhem bha bad ba long paralok ïa baroh.Ha kane ka juh ka sngi hadien ba la dep plie ïa ka surok u MLA u la plie ruh ïa ka paiñkhana kaba u la pynshna na ka bynta ka ïing dong kaba u la mang na ka skhim jong u.
Hadien kane u bah PT Sawkmie u la hiar sha ka shnong Umpling Umjathang, Mawsiatkhnam ban plie ïa ka madan phutbol kaba la pynheh na ka skhim jong u kaba la mang 4 lak tyngka ha ka jingdon ryngkat u rangbah shnong bah Shemphang Wahlang, u Rangbah dong, ki nongkitkam, ki paidbah bad kiwei kiwei.
Haba ai jingkren u bah PT Sawkmie u la pynpaw ka jingsngewkmen ba u la ïoh ban plie ïa ka surok bad ka madan phutbol kaban long ka jingkyrkhu ïa ki paidbah nongshong shnong jong ka thaiñ hi baroh kawei..
Kiwei kiba la ai jingkren ha Mawtawar ki long ki rangbah dong u bah Wallambok Mukhim, bah P. Kharumlong, Bah Hubert Kharkongor, rangbah dong Riattamdong bad kiwei.
Kiba ai jingkren ha Umpling Umjathang ki long u bah Teibok Kharkongor, u bah Khraw Lyngdoh, secretary dong, bah Homer Kharkongor, president ka UDP Mawlai Circle, bah Wanseng Jyrwa, working president UDP Mawlai Circle, deacon bah P. Jyrwa bad u bah Shemphang.
