Ym kwah ka Seng RWDO ba ka Pynursla consti-tuency kan shah kduplang ha ka Sohra District

Shillong, K’Lyngkot :Ka Seng Ri War Development Organization (RWDO) ka la ong ba kam kwah da lei lei ruh ba ka ba ka Pynursla Constituency kan shah kdup lang ha ka Sohra District.
Halor kane ka bynta na ka liang ka seng kan sa phah ruh da ka jingthoh sha ka Sorkar MDA ba kin ym lah ban pdiang da lei lei ruh em namar ïoh lehse ba kane ka sorkar kan pynhap lang ne kdup lang ïa ka Pynursla Constituency hapoh ka Sohra District kaba kin sa thaw thymmai.
Ka Seng RWDO ha u kyrwoh lyngba u Bah Tensing Khonglah, Working President ka la ong ruh ba ka daw hi ka long ba ki pyrshah halor kane ka bynta (Sohra District) ka dei namar ka jinglong ka ïaid ka ïeng, ka lynti ka synkieng kam ïahap shuh bad ki paidbah kiba shong ba sah ha ka Thaiñ Riwar Pynursla Constituency bad kan wanrah pynban shibun ki jingeh ïa ki paidbah ka Thaiñ ha ka jaka ban wanrah jingsuk na ka bynta jong ki.
“Kum ka Seng kaba peit ïa ka bha ka miat jong ki paidbah salonsar ngim don kano kano ka jingpyrshah ïa ki paidbah nongshong shnong ka Thaiñ Sohra ba kin dawa ban ïoh noh la ka jong ka District bad ngi ai jingkyrshan pura hi ruh ïa ki ba kin ïoh noh ïa kane jingdawa District ka jong ki. Hynrei tang kawei da kaba shai ngi kum ka Seng RWDO ngi pynpaw ba phin sngewbha ban ym kynthup lang ïa ka Pynursla Constituency ka jong ngi ha ka map jong ka Sohra District jong phi, namar ngi rai beit ban don ha ka East Khasi Hills District kumba ju long ju man na ki por sha ki por, ka daw ka long ba ngi kham suk bad kham jan ban pyndep ïa ki kam ki jam ki jong ngi sha Shillong kaba dei ka Head Quarter jong ka East Khasi Hills District,” ong u kyrwoh.
Kyntang ïawai ka Seng RWDO ka kyntu jur ïa ki bor Sorkar ba kin ym kynthup da lei lei ruh em ïa ka Pynursla Constituency ha ka map jong ka Sohra District kaba kin thaw thymmai.