Shillong, Naitung 20: Ka Agency for Sustainable Development Initiatives (AFSDI) jong ka K.J.P Synod Sepngi, kumba ju leh man u snem, kan sa pynlong biang ïa ka jingïakop mareh kaba la tip da ka ‘Shillong Run 10K 2026’ ha ka 01 tarik Nailar, 2026.
Kane ka jingïakop mareh kan sdang ha ka por 5:30 mynstep bad kan sdang na SRGT Parking Lot, Polo.
Kane ka jingïakop kan kynthup ïa lai tylli ki kyrdan: Junior (hapoh 15 snem), Senior (15 snem shajrong), bad kiba don jingduna ha ki dkhot met lane Persons with Disabilities.
Ki nongpynïaid ki la pyntip ba ka jingpynrung kyrteng kan long lyngba ka Online na ka website: https://www.runindia.in/events/OF8C0gdtT4nmXQ3paD4Xg ne http://www.afsdi.org. La ai por ïa kino kino kiba kwah ban shim bynta ban pyndep ïa ka jingpynrung kyrteng ha lane shuwa ka 27 tarik Nailar, 2026.
Ka bai rung na ka bynta kiba 15 snem hapoh kan long 300 tyngka ïa ki trai jylla bad 400 tyngka ïa kiba nabar; kiba 15 haduh 18 snem ka bai rung kan long 400 ïa ki trai jylla, bad 500 ïa kiba nabar; 18-35 snem kan long 800 tyngka (trai jylla) bad 1000 ïa kiba nabar; 35-65 snem shajrong ka bai rung kan long 600 kiba na Meghalaya katba 700 ïa kiba nabar.
Katba ki nongïashim bynta kiba don jingduna ha ki dkhot met lane Persons with Disabilities kim donkam ban siew ïa ka bai rung, hynrei ki donkam ban pynbiang ïa ka Disability Certificate.
Ka jingmareh na ka bynta Senior 10K kan sdang na SRGT Polo, Lawmali, Jaiaw, Riatsamthiah, Wahingdoh, G.S Road, Khyndai Lad, DC Office, Barik, Don Bosco, Polo Bazar, phai pat sha SRGT Polo.
Na ka bynta hapoh 15 bad PWD sdang na SRGT Polo, Lawmali, Jaiaw Lumpyllon, Jaiaw St. Joseph, Wahingdoh, Khyndai Lad, Polo Tower, phai sha SRGT Polo.
Na ka liang ki nongpynïaid ki la pyntip ruh ba kin sa sam ïa ki Chest Number ha ka sngi pynlong ïa ka jingmareh bad la kyrpad ïa ki nongïashim bynta ba kidei ban da deng ha ka por ba mareh.
Kiba wan ba nyngkong ha ka Open Category; kata 18-35, kin ïohpdiang ïa ka khusnam pisa kaba Rs.55,000, kiba wan ba ar kin ïoh Rs.35,000, bad balai Rs.25,000. Ka khusnam pisa na ka bynta kiwei pat ki kyrdan, ka long Rs.6,000 ïa kiba wan ba nyngkong, Rs 4,000 ïa kiba wan ba-ar, bad Rs.3,000 ïa kiba wan balai. Yn sam khusnam ruh mar Rs 1000 tyngka ïa kiba pyndep ha ka kyrdan ba 4 haduh ba 7.
Shuh shuh, baroh ki nongïashim bynta kiba pyndep ïa ka jingmareh kin ïohpdiang ïa ki takma ba la pynkhreh.
Yn sam ïa ki Bib Number ha ka 30 bad 31 tarik Naitung 2026, naduh ka por 11 baje mynstep haduh 5 baje janmiet ha Office KJP Synod Sepngi, Mission Compound (kaba marjan ka KJP Girls HSS). Kan don ruh ka jingsam ïa ki T-Shirt ha ka rukom kaba kat kiba wan nyngkong kin ïoh nyngkong.
Na ka bynta ki jingtip ba kham bñiah phi lah ban phone ha kine ki number +91 87875-45266 / +91 89747-61582 / +91 94365-57222.
Khyndiat, ka AFSDI jong ka K.J.P Synod Sepngi, ka la ju pynlong ïa kane ka jingïakop mareh man la u snem, ryngkat ka jingthmu ban pynshai ïa ka jingkyrshan, ka jinglong ba ïaryngkat bad ka jingailad ïa ki briew kiba don jingduna ha ki dkhot met lane Person with Disabilities (PWD) ha ka imlang sahlang. Ka sienjam ba nyngkong ka la sdang ha u snem 2011.
Ka pisa ba la ïalum na kane ka Shillong Run la pyndonkam ban pynbha ïa ki kam bad ka jingtei ïa ki projek ba ka Social Economic Life Development Department, K.J.P Synod Sepngi ka la trei lyngba ka AFSDI.
