Rah ka Spain ïa ka FIFA World Cup 2026
*Kaba nyngkong ban jop pynbud lynter ar sien ïa ka Euro bad FIFA World Cup. *Kaba nyngkong ban bat nam lahduh jong ka FIFA World Cup kynthei bad shynrang. *Thaw rekod thymmai, da kaba pynjlan 38 tylli ki jingïakhun khlem shah rem.
MET LIFE, Naitung 20: Ka Spain ka la ïoh ban rah ïa ka nam lahduh kaba ar ha ka FIFA World Cup hadien ba ka la pynliem da 1-0 kol ïa ka Argentina ha ka jingïakhun phainal ha Metlife Stadium, New York ha ka shiteng miet jong ka sngi Nyngkong.
U Ferran Torres u la pynkhih ïa ka namtam ha ka minit kaba 106 jong ka por pynjlan katba ka Spain ka la pynjlan ïa ka jingïalehkai khlem shah rem jong ka sha ki 38 tylli ki jingïalehkai, ban thaw ïa ka rekod kaba thymmai.
Ka Spain ka la wanrah ïa ka jingïalehkai kaba khlaiñ ha baroh kawei ka lympung, da kaba shah thep tang kawei ka kol ha ki 8 tylli ki jingïalehkai ha kane ka lympung kaba ju long man la ka saw snem.
Da kaba rah ïa ka nam lahduh, ka Spain ka la kylla long ka ri kaba nyngkong eh ban bat ïa ka nam lahduh ha ka World Cup jong ki shynrang bad kynthei ha kajuh ka por. Ka kynhun ïalehkai jong ki kynthei ka la jop ïa ka sienjam 2023 jong ka FIFA Women’s World Cup hadien ba pynliem ïa ka England da 1-0 ha ka phainal.
Ka Germany ka dei tang kawei pat ka kynhun kaba lah ban rah ïa ka nam lahduh ha baroh ar tylli ki jingïakop.
Nalor kata, ka Spain mynta ka dei ka kynhun kaba nyngkong eh ban jop lynter ïa ka Euro bad pynbud sa da ka World Cup ha ki ar tylli ki khep bapher bapher. Ka la lah ban kynjoh ïa kane ka thong ha ka sien kaba nyngkong eh ha ka por ba ka la jop ïa ka Euro ha u snem 2008 bad ka World Cup 2010.
Kiwei pat ki ri kiba kynjoh ïa kane ka thong ki long tang ka West Germany (Euro 1972 & World Cup 1974) bad ka France (World Cup 1998 & Euro 2000). Hynrei tang ka Spain mynta kaba don ka hok ban sngew sarong ban leh arsien. Hynrei tang ka Spain mynta kaba don ïa ka bor ban kynjoh ïa kane ka thong haduh arsien.
Kane kadei ruh ka jingjop kaba 38 sien lynter jong ka Spain ha ki jingïalehkai phutbol bar ri kaba la ïarap ïa ka ban tam shakhmat ïa ka Italy kaba la bat ïa ka rekod khlem shah rem kaba jrong tam mynshwa, haduh 37 sien ïakhun.
Ka Spain, lahduh jong ka Euro Championship ba mynta, ka la jop ïa ka nam lahduh kaba ar jong ka ha ka World Cup, da kaba pynneh pynsah ïa ka rekod kaba 100 percent ha ka phainal.