Yn pynlong ïa ka CM Under-12 FT Block & District Level ka South West Khasi Hills District 2023

Mawkyrwat, Ïaïong 12: Ka ophis jong u District Sports Officer (DSO), South West Khasi Hills District (SWKHD), Mawkyrwat kan pynlong ïa ka Block bad District Level Chief Minister Under-12 Football Tournament 2023 na bynta ki kynthei bad shynrang ha Ranikor bad Mawkyrwat Block naduh ka 10 tarik Jymmang, (May) 2023 bad ki kynhun kiba jop ha kane ka lympung na baroh ar tylli ki Block kin ïa khun ha ka District Level ka ban long ha 19 & 20 tarik Jymmang, 2023 hapoh Mawkyrwat.
Na kane ka lympung yn sa jied ïa ki nongïalehkai ba tbit na baroh ar tylli ki Block ban mihkhmat ïa ka District sha ka State Level ka ban sa long shen ha Shillong.
Kino kino ki Skul, Sports Club lane Association kiba kwah ban shimbynta ha kane ka jingïalehkai kin sngewbha ban wan shim ïa ki phom (form) na ka Ophis treikam jong u DSO, South West Khasi Hills District ha kano kano ka por long trei. Ka tarik ba khatduh ban pynpoi ïa ki phom kan long ha 2 tarik Jymmang, 2023.
Ka Sngi kha na bynta kito ki nongïashimbynta kynthei bad shynrang ka dei ban long naduh ka 30-06-2011 bad hapoh ïa ka 30-06-2014.
Ïa ki jingtip ba kham bniah lah ban wan kylli na ophis lane phone ha kine – 9485358870/9856925283. Kane ka long na ka kyrwoh khubor na u bah D. Syngkon, District Sports Officer, South West Khasi Hills, Mawkyrwat.