Jowai, Ïaïong 18: Ka West Jaiñtia District Sports Association, Jowai kan pynkut noh ïa ka jingrakhe dap 50 snem ne ka Jubilee Ksiar ka ban long ha ka 22 tarik u Ïaïong 2023 ha Kiang Nangbah Stadium, Ladthadlaboh Dongmihsngi, Jowai haka por 1 baje nohphai sngi.
Ha kane ka sngi u Symbud Myntri Rangbah jong ka sorkar jylla u ma Sniawbhalang Dhar un long kum u kongsan, ha ka jingdonlang u bah Shakliar Warjri myntri ka tnad Sports & Youth Affairs ka jylla ki dkhot ka WJDSA nalor kiwei de.
Ha kaba ïadei bad kane ka Association lyngba u Hony. General Secretary ma Lammat-oo Laloo ka khot sngewbha ïa baroh naduh ki nongtrei ba rim ka Association, ki riew ieit Sports bad kiwei de ban ïawan sakhi lang ha kane ka sngi pynhap pyrda. La ïathuh ruh ba ka Association shi bynta na kane ka jingrakhe Jubilee ksiar kala pynlong ïaki prokram ïalehkai bapher bapher.
