Hiar ki kam jngohkai pyrthei ha South West Khasi Hills bym biang ki surok ba paka

Mawkyrwat, Ïaïong, 18: Ka long kaei kaei ka jingduhnong kaba khraw ïa ki shnong ki thaw, ka distrik, ka jylla bad ka ri baroh kawei namar tang na ka daw jong ka jingbym don jong ki surok kiba biang ka wanrah shibun ki jingdkoh ha ka jingwan jong ki briew kiba ju im ha ka jngohkai pyrthei la ka long ha ki jaka sor bad khamtam eh ha ki jaka nongkyndong kiba dang bun bah ki jaka jngohkai kiba pyngngad.
Hangne mynta ngin phai ba kawei kaba uwei na ki samla jong ka dong ka thaiñ u kwah ban pynpaw halor kane ka bynta ba tang na ka daw jong ki jingbym don ki surok kiba biang kawei na ki distrik ka South West Khasi Hills District ka la long kawei na ki jaka ba la shah ieh beiñ ha ki lynti ki synkien bad dei na kata ka daw ka kam jngohkai pyrthei ha kane ka distrik ka kham duna bha.
Haba kren ha ki lad pathai khubor, u bah Commander Shangpliang u la ong ba ha ka jingleit jong u ha kawei na ki jaka jngohkai pyrthei kaba la khring bha ïa kiba bun ki nongwan jngohkai ha Mawruduk, Tynrong kaba dei ka jaka kaba hap hapoh ka shnong Mawlangwir, South West Khasi Hills District bad ha kaba dang shen ma u ruh u la ïoh ban wan ïalam ïa ki briew napoh Australia ba kin wan ïuh kjat da lade ha kaba ma ki ruh ki ai ka jingïaroh ïa ka jingitynnad jong kane ka jaka.
“Mynta nga don hangne ban pynpaw ïa ki jingdonkam ba ngin kyntiew ïa ka kam jngohkai pyrthei hapoh jong kane ka dong ka thaiñ jong ka South West Khasi Hills District baroh kawei”, ong u bah Commander bad kumjuh ruh kane ka thaiñ ka don ruh ïa shibun bah ki jaka jngohkai jong ki mawbynnad ha shnong Mawlangwir, ka jaka pynneh pynsah ïa ki doh-um doh-wah hapoh shnong Rohbah, u Lum Nongsynrieh, ka Synrang Mawrin, ka Kshaid Urnar, Ka Hor-Spring, ka Mawranglang Viewpoint, bad kiwei de.
Namarkata, u la ong ba ban kyntiew ïa kine ki jaka jngohkai kum ki paidbah ki donkam ïa ki surok kiba biang ha kaba kumba ka long mynta naduh Lad-Mawreng haduh Mawkyrwat ki ïoh tang ïa ka surok kaba sinew kab khoh-ruh khoh-ram.
Ha kajuh ka por u la ong ruh ba kumba la ïoh jingtip ba ka sorkar kan sa shna ïa ka surok Intermediate Road na Lad – Mawreng haduh Weiloi bad kumjuh ruh na Weiloi sha Mawkyrwat lyngba ka Northeast Infrastructure Development Scheme (NIDS), hynrei kum uwei na ki samla rangbah jong ka dong ka thaiñ u sngewdonkam ban pynsngew ba na ka liang ka sorkar India ka dei ban ithuh noh ïa kane ka surok kumba ka National Highway namar ba kine ki state scheme ban shna ïa ki surok kan long tang kumba 5 meter tam katba ka National Highway pat ka don ha ka ïa ka two lane kaba don kumba 10 meter ei ei ha kaba kane ka long ka surok kaba lah ban khring ïa shibun ki nongwan jngohkai pyrthei.
U la pynkynmaw ruh ba ha u snem ba la dep na ka liang u Myntri Rangbah duh ba dei peit ïa ki surok, u Nitin Gadgarry u la dep ban pynbna ba ïa kane ka surok na Lad – Mawreng sha Mawkyrwat haduh Ranikor yn ithuh noh kum na surok bah ne National Highway, hynrei ym lah ban tip na kaei ka daw la pynduh noh ïa ka. Kumta mynta ka la dei biang ka por ba ki paidbah jong ka South West Khasi Hills District kin dawa biang ban pynïoh da ka National Highway khnang ba ka leit ka wan kan long kaba suk.
Ym tang kata u la buh ruh ka jingkyrpad ïa ki nongmihkhmat ba kynthup na Mawkyrwat, Ranikor, Mawphang bad na Mawsynram Constituencies ba kin don ka jingïatreilang na ka bynta ban pynsngew ha ka sorkar India ba kin bhah biang ban pynïoh ïa ka National Highway. “Da ka jingdon jong ki surok kiba bha, ki samla jong ka dong ka thaiñ ki don ka jingkyrmen ba ka kam jngohkai pyrthei kan sa kiew bad ka lah ruh ban wanrah ka ïoh ka kot kaba biang”, u la ong.