Yn pynkup burom ka KSU Wapung ïa ki samla pule da ka 4th Woh Tep Kyndait Memorial Academic Award

Khliehriat nailur 4: Ka Khasi Students Union Wapung Unit lyngba u kyrwoh na u Education Secretary u samla Lucky Rymbai, la pynbna ba ka seng kan pynkup burom da ka 4th Woh Tep Kyndait Memorial Acadamic Award 2023 ïa kito ki samla pule jong ka thaiñ kiba pass bha bad kiba wan ha ka kyrdan ba shakhmat, kiba ïakhun ïa ka exam SSLC, HSSLC, Bachelor Degree (B.Sc, B.Com, B.A), kumjuh ruh ki Master Degree, PhD, Engineering, kiba ïakhun na ki Board lane ki University bapher bapher.
La ong ba kane ka jingai khusnam jong ka seng, ka dei kum shibynta ba pynshlur bad ai mynsiem ïa ki samla pule jong ka thaiñ ba kin nang iai kiew shaphrang ha ki jingpule jong ki bad ki thaiñ kiba kynthup hapoh kane ka Unit ki dei ka shnong Mookhep, Wapungskur, Wapungshnong, Tuberkmai shnong bad Tuber Sohshrieh.
Kiba lah ban ioh ïa kane ka khusnam ki dei kito ki pass ïa kitei ki kyrdan jingpule bad kiba ioh 60 percent sha neng ki mark.La bthah ruh ba kito ki samla pule jong ka thaiñ kiba kynjoh ïa katei ka percentage, ki lah ban phah copy ïa ka marksheet jong ki ha u number 8413805987 bad ka sngi ban pdiang ïa ki marksheet ka dei naduh mynta ka sngi ka 4 tarik u nailur haduh ka 25 tarik u nailur 2023.
Ïa ka sngi bad ka por ban pynlong ïa katei ka prokram ai khusnam yn sa pyntip hadien.