Yn pynkhreh ka NHIDCL ïa ki lad ban ïada na ka jingtwa ha surok Shillong-Dawki

Shillong, Iaiong, 25: U Symbud Myntri Rangbah ba khmih ïa ka Tnad PWD (Road) Bah Prestone Tynsong ula pyntip ba ka National Highways & Infrastructure Development Corporation Limited (NHIDCL) kan sa pynkhreh ïa ka Plan kumno ban tehlakam bad ïada ïa ki jingtwa khyndew ym tang ha Rngain hynrei wat ha kiwei kiwei ki jaka shilynter ka surok na Shillong sha Dawki.
Hadien ba pynlong ïa ka jingïalang mynta ka sngi Ba-ar, u Bah Prestone ula pyntip ba la ïatai sani halor ki jaka ba jur ki jingtwa khyndew bad ki la (NHIDCL) ithuh ïa katto katne ki jaka bad kumno ban ïada namar ka long ka jingma da ka jingwan jong ka aiom Lyiur mynta.
“Ngi la dep ïakren ïa baroh kiba donkam. Ki briew jong ka NHIDCL kin sa pynkhreh ïa ki lad jingiada ba kumno kin leh bad ban pynthikna ba kan buh ïa ka kynhun ki ban khmih lada mih kino kino ki kam ba kyrkieh ha baroh 24 kynta man ka sngi” ula ïathuh.
ïa kane ka rai la shim hadien ba arngut ki briew ki la iap na ka jingtwa khyndew kaba shyrkhei ha Rngain.
Haba kylli ïa kaei ka jingpynshitom ba la shim pyrshah ïa u contractor, u Symbud Myntri Rangbah ula ong “La pyntip sha nga da ka NHIDCL ba ka la pynkut ïa ka jingaikam kontrak ïa ka kompani ARSS namar ka jingtrei torti kaba la wanrah ka jingtwa ka khyndew bad duh ei arngut ki mynsiem briew. Kumta, ka Head Office jong ka NHIDCL kala pynwai ïa ka soskular ba la ïateh bad ka ARSS, kaba pyntrei ïa ka Package-II kaba dei naduh Mylliem haduh ka by-pass Pynursla”.
Ha kajuh ka por, ïa ka package-I, package-2 bad package-4 ruh la ïakren ha kane ka jingïalang ha kaba la bthah ïa ka NHIDCL ban sdang noh mar mar ïa ka jingkhot tender ïa kine ki bynta jong ka surok Shillong-Dawki.