Ka pynhiar dor ïa ka kyrdan u Dy. CM ban ong pynshong tnum bos ïa ki party rit : Sandondor

0

Shillong, Ïaïong 25: U Kyrtong ka Hill State People Democratic Party (HSPDP) u Bah Sandondor Ryntathiang u la ong ba ka jingkren jong u Symbud Myntri Rangbah ka jylla u Bah Prestone Tynsong uba la ong ban pynshong tnum bos ïa ki party rit kiba don ha ka sorkar ka dei ka jingkren khunlung khynnah kaba la pynhiar dor wat ïa ka kyrdan kaba u bat.
“Ka jingong u Bah Prestone ba ïa ki party rit kiba tyrwa ban ai jingkyrshan ïa ka sorkar MDA ban ïalam da ka NPP yn shu pynshong sha tnum bos ka la dei ka jingkren da ki kyntien kiba tad dor haduh katta katta kaba pynhiar dor wat ïa ka kyrdan kaba ki bat,” ong u Bah Sandondor Ryntathiang haba ïakren sha ki lad pathai khubor.
“Ha ka history ka saiñ hima ha ka jylla ka jingdon ki sorkar khleh khawlang ka ju jia naduh ki snem ba mynshuwa bad haduh mynta hynrei ban ong pynshong tnum bos ka long kaba ym lah pdiang ban kren syndon da u nongïalam ka jylla,” u la bynrap.
U la ong ba ha ka saiñ hima kam mut ba tang ba ka party kaba heh ka lah ban leh katba ka mon hynrei kan hap pan lang ïa ka jingmynjur jong baroh.
“Tang ban la jop bun tam kam mut pat ba ki party rit kim don bynta ha ka saiñ hima hynrei ki don ka bynta kaba khraw ban saiñdur,” u la ong.

Leave A Reply

Your email address will not be published.