Na Nongstoiñ yn sdang ka jingïakhih ba ar ka VPP halor ka Reservation bad Roster

0

Shillong, Ïaïong 25: Ka Seng VPP ka la pynkhreh ban sdang noh sa ïa ka bynta kaba ar na ka bynta ka jingïakhih halor ka Reservation Policy bad ka Roster System. Ïa kane la ïathuh da u Bah Ardent Miller Basaïawmoit, President ka Party ha ka jingïalang jong ka Seng ha Mawngap mynta ka sngi.
Haba kren ha kane ka jingïalang, u nongïalam ka VPP, u la ong ba ka Party ka la pynkhreh ban leit pynlong noh ïa ki jingïalang ha Mawngap na ka bynta ban pynrung dkhot ïa ki paidbah ka Mawphlang Constituency.
“Ngin sdang noh shen ïa ka bynta kaba ar da ki jingïalang ha Nongstoiñ, West Khasi Hills District, Mawkyrwat, South West Khasi Hills District, Nongpoh, Ri Bhoi District bad kumjuh ruh ha ki Civil Sub Division”, la ong u Bah Ardent.
Dang shen u Myntri Rangbah, u Conrad Sangma, u la pynpaw ba ka sorkar kan shong shuwa ïa ka jingïalang jong ka kynhun Myntri ban ïakren ïa ka Roster System bad ka Reservation Policy. Hynrei haduh mynta ym pat ïoh khubor lano ka kynhun Myntri kan shong pyrkhat ïa kane ka kam.
U MLA Nongkrem, u la ong ba ka VPP ka la ïaid ruh kylleng kylleng ki jaka ban pynrung dkhot sha ka VPP ïa ki paidbah, khnang ba lada donkam ban pynlong da ki jingïakhih paidbah, ka Seng kan donkam ïa ka jingïasnoh ktilang jong ki ha kane ka jingïakhih ban pynbor ïa ka sorkar ban pynsangeh treikam shuwa ïa ka Roster System bad kan pynkylla ïa ka Reservation Policy.
“Ngin donkam ïa ka jingïasnoh ktilang jong phi lada ngi pynlong ïa ka jingïakhih paidbah khnang ba ka sorkar kan ïohi shisha ïa ka bor jong u paidbah”, la ong u Bah Ardent.
Ha kane ka jingkren u Bah Ardent u la kren shai ruh na ka bynta kito kiba kwah ban ïakhun MDC na ka Seng VPP, ha kaba u la ong ba ïa mynta ka Seng kan nym pat ïakren ïa ka ticket, hynrei yn ïakren shuwa ïa ka jingpynkhlaiñ ïa ka Seng da kaba pynrung dkhot ha kylleng kylleng ki Constituency. “Kiba kwah ban ïaleh elekshon na ka VPP kin hap long kum ki shipai kiba kohnguh, kiba tip ïa ki nongrim jong ka Party bad kiba sngap ïa ka jingbthah jong ki nongïalam ka Party”, u la ong.

Leave A Reply

Your email address will not be published.