Shillong, ïaïong, 25: U Symbud Myntri Rangbah uba peit ïa ka tnat Kam Pohïing u Bah Prestone Tynsong ha ka sngi Baar ula ong ba ka Sorkar ka la buh hakhmat ïa ka thong ban pynthikna ban pynshitom da kaba tyngeh ïa ka jingtih bad ka jingshalan beaiñ ïa u dewïong.
“Ka jingthmu ka long kaba shai na liang jong ka Sorkar la ka long ha ka samoi treikam kaba ladep lane ha kane ka kynti kaba mynta bad nga kren da kaba shai shaphang kata ka kynhun High Level Committee kam dei ban ïoh jaka bad ha ka jingshisha kam don hi ruh bad ngan pynthikna ba ka jingpeitngor kan long ha baroh kawei ka jylla Meghalaya,” ong u Bah Tynsong ha ka jingïakren bad ki lad pathai khubor.
Dang shen, u President ka MPCC u Bah Vincent H. Pala u la ïaroh ïa u Bah Tynsong namar ka jingshimkhia ban tehlakam ïa ki “high-level”, ha kaba la kynnoh ba ka dei ka kynhun kaba donkti ban pynïaid ïa ka jingkhaii tuh ïa u dewïong shabar jong ka jylla.
Ha kaba ïadei bad ka hukum jong ka Iingbishar kaba la pan 10 pyrton ki Pulit Central Armed Police Force (CAPF) ban kem ïa kiba donkti ha kaba shalan beain ïa u dewïong, u Symbud Myntri Rangbah u la ong ba ka Sorkar Jylla ka la phah da ka jingthoh sha ka Sorkar Pdeng da kaba pynshong nongrim katkum ka hukum ba la pynmih da ka Iingbisshar ban pan ïa ki pyrton Pulit Central Industrial Security Force (CISF) bad mynta da ka kynhun Pulit CAPF.
“Namarkata, ngam pat tip la ki (Sorkar Pdeng) lah neem ban ai ïa ngi kumba ngi pan. Ïa mynta ngam pat lah satia ban ong eiei,” u la ong.
U Bah Tynsong haba kam ba ka jingkhaii tuh ïa u dewïong kam don shuh, u la ong, “kino kino kiba shalan (beain) ïa u dewïong ha surok kin shah kem katkum ki kyndon jong ka aiñ”
Haba kylli, hato ka jylla ka dang donkam neem ïa ka jingshakri jong ki Pulit CAPF, u Bah Tynsong u la ong, “wat ïanujor ïa ka hukum jong ka Ingbishar High Court bad ka kamram jong ka Sorkar Jylla. Ngi don hangne ban pynthikna ba kan ym don kano kano ka jingïaid beaiñ lane ka jingtih dewïong beaiñ ha ka jylla baroh kawei.”
