Yn pynbeit thymmai ka Sorkar ïa ka MPCAA, 1990 ban ïada ïa ki tyllong um ha Jylla

Shillong, Nailar, 30: U Myntri Rangbah ka jylla u Conrad K Sangma ha ka sngi Thohdieng u la ong ba ka jingpynbeit thymmai ba pura ïa ka Meghalaya Protection of Catchment Area Act, 1990 ka dang don ha ka jingpeit bniah khnang ba yn lah ban pyntreikam ïa kane ka aiñ ha ka rukom kaba dei ryngkat ka jingïatreilang jong ki trai jaka bad ki kynhun bapher bapher.
Haba ai jubab ha Ingdorbar Thawaiñ, u Sangma u la ong ba ïa ka Meghalaya Protection of Catchment Area Act 1990 ym shym la lah ban pyntreikam hok namarba kam ai kano kano ka lad ban thaw ïa ki tyllong um lait noh tang lyngba ka jingmynjur jong ki trai jaka nalor ba ka long ruh ruh ka kam kaba eh haduh katta katta.
“Kumta, ka jingpynbeit thymmai kaba bniah ïa ka aiñ ka dang don hapdeng ka jingpeit bniah. Ngin sa don ka jingïamir jingmut bad ki trai jaka (bad kiwei dei ki kynhun kynthup ruh ïa ki dorbar shnong). Ngi plie ïa baroh ki lad ki lynti, ka jingïakren bad baroh ki jait jingpynbeit thymmai ban pynthikna ba ïa kane ka aiñ yn dup lah ban pyntreikam ha ka rukom kaba biang ryngkat bad ka jingïatreilang jong ki trai jaka (bad kiwei kiwei ki kynhun),” u la ong.
U Sangma u la ong ba ka aiñ ka la kdew ba ka Sorkar ka lah katkum ka jingai jingmut jong ka Advisory Board bad ynda la ïoh ïa ka jingmynjur jong ki trai jaka ka lah ban pynbna ïa kano kano ka jaka kum ka tyllong um.
Hynrei u la ong ba ka Sorkar kam shym la ïoh ïa ka jingmynjur da ka jingthoh na ki trai jaka ha baroh ki jaka ba la ithuh ban pynbna kum ki tyllong um. Kine ki dei ki jaka kiba kongsan na kaba ki wah, ki wahduid ki mih bad ki long kum ka jaka pynpoi um sha kano kano ka shnong.
“Namarkata, nga kyrpad ïa ki MLA jong kane ka Iingdorbar ba ngi donkam ban ïatrei lang namarba ka donkam ïa ka jingmynjur jong ki trai jaka…(kane ka long ruh) ka khubor sha ki trai jaka ba ngi donkam ban ïatreilang na ka bynta ka jingmyntoi jong ka mynta bad ka lawei ka pateng ban wan,” la bynrap u Sangma.
Shuh shuh, u Myntri Rangbah u la pyntip ba ka Sorkar ka la ithuh ïa palat 7000 tylli ki tyllong um kiba jur bha ka jingpynmih um ha ka jylla bad na kine, 750 tylli ki don ha ka jingshisha ki don ha u pud ba ki lah ban tyrkhong noh.
“Ngi la wanrah ïa ka jingthmu lyngba ka tnat Soil and Water Conservation. Ngi la ïatreilang ruh bad ka tnad PHE ban pynneh pynsah bad ban pynthymmai ïa kine ki tyllong um da kaba pyndonkam ïa ki kor ki bor katkum ka juk mynta,” u la ong.
Shwa kane, haba pynpaw ïa ka jingsngewkhia halor kane ka mat, u MLA ka UDP na Mawsynram u bah Ollan Sing Suiñ u la kyntu ïa ka Sorkar ba ka dei ban sumar ïa baroh ki tyllong um namarba kan poi ka por ba ka um kan kyrduh bad ki tyllong um kin rngad noh. U la ai jingmut ruh ïa ka Sorkar ban pyrkhat ïa ka jingshim jaka na ka bynta ban ïada ïa ki tyllong um.
Haba pynpaw ïa kajuh ka jingsngew, u MLA ka UDP na Mawkyrwat u Bah Renikton Lyngdoh Tongkhar u la kyntu ïa ka Sorkar ban pynbeit thymmai ïa ka aiñ da kaba bthah ïa ki Dorbar Shnong ban pynbna ïa ki tyllong um kum ki jaka ba la ïada.
“Ha ka jaka ba ka Sorkar kan ai jingithuh bad ban pynbna ïa ki tyllong um, ai ba ka imlang sahlang ne u Syiem un pynbna halor kane bad ban ïoh da ka jingmynjur na ka Sorkar,” u la ong.