Byrngem u Dr Mukul ban ai jingthoh sha u PM hadien ba kob u Dy CM ïa ka TMC ban ujor FIR

Shillong, Nailar 30 : U Nongïalam ka Liang Pyrshah u Dr Mukul Sangma mynta ka Sngi Thohdieng ula byrngem ban ai da ka jingthoh sha u Myntri Rangbah duh ka ri India u Narendra Modi ban leh da kaba tyngeh halor ka jingkynnoh ba ka National People’s Party (NPP) ka pyndonkam da ka pisa ba khaïi beaiñ ïa u drok bad u dewiong ban leh ïaki kam beaiñ.
Kane ka jingbyrngem u Dr Mukul ka la jia shisngi hadien ba u President ka NPP ha kane ka jylla uba dei ruh u Symbud Myntri Rangbah u bah Prestone Tynsong u la kob ïa u nongialam ka TMC ba un ujor da ka FIR halor katei ka jingkynnoh jong u President ka Congress u ma Vincent H Pala ïa ka NPP ba ka pyndonkam da ka pisa na ka kam khaïi drok bad dewiong ban thied ïa ki MLA jong kiwei ki seng saiñ pyrthei.
Ha ka 16 tarik mynta u bnai u ma Vincent H Pala u la kynnoh ba ka NPP ka pyndonkam da ka pisa beaiñ ba ka la ïoh lum na ka kam khaïi drok bad dewiong ban pynjot bad pynduh pyndam ïa kiwei ki seng saiñ pyrthei ha ka jylla.
Haba pynphai kylla ïa ka jingkynthoh jong u Symbud Myntri Rangbah halor ka jingdawa ban thung jingtohkit halor ka jingkynnoh u Dr Mukul u la ong ba u leh ïaka kam ram ba ki ar party ka NPP bad ka Congress kin don ka jingsngewkit khlieh khyndiat namar kum kitei ki jingkynnoh ki long kiba khia bha haduh katta katta.
“ Kumta lada kim shim khia ngam banse ngan ai da ka jingthoh sha u Myntri Rangbah duh halor kine ki jingkynnoh bad ban kyrpad ïa u ba un shim khia ban leh ïa kaba donkam” ong u Dr Mukul. “ Hooid ngan ap shwa hynrei lada kim leh ei ei ngam banse ngan leh ïa kaba donkam namar kane ka dei ka kamram kaba ngan hap ban shim khia” ong biang u Dr Mukul.
U la ong ba ki don lai tylli ki jingkynnoh jongka Congress ïa ka NPP kaba nyngkong ka dei ka pisa beaiñ ba wan na u drok, kaba ar ka pisa beaiñ kaba wan na ka kam tih bad khaïi dewiong bad kaba lai ka dei ka pisa beaiñ ba wan na ki kam kontrak. U la ong ba kane ka kam ka dei hapdeng ka Congress bad ka NPP ym dei ka TMC. “ Nga shu dawa ba halor kine ki jingkynnoh dei ban pynshisha hynrei lada kim sngewthuh ïa kata kaba nga thmu ngan sa leh ïa kaba donkam. Nalor kata ka NPP ka dei ban pynshisha namar kine ki jingkynnoh ki wan na u President ka MPCC uba dei u MP ba rim ka jylla u Vincent Pala khnang ba ki paidbah ruh kin shai bad ba u Pala ruh un sah ha ka lehraiñ hakhmat ki paidbah lada kim dei kiba shisha” ong u Dr Mukul
“ Ki dei ban shim khia ban leh ei ei ban pynpaw sha ka pyrthei ba ki jingkynnoh jongu Vincent ki long kiba bakla lada kita ki jingkynnoh kim long kiba shisha. Nga mut ïa kata, hynrei kam pher ngam sngew ei ei halor ki jingkynnoh u Symbud Myntri Rangbah tangba ki dei ban pynshisha beit ïa kine ki jingkynnoh kiba wan na u President ka MPCC” ong u Dr Mukul.
Haba pynpaw ïa ka jingdonkam ba ka sorkar pdeng ka dei ban shim khia ïa kane ka kam u Dr Mukul u la ong ba ka kam tih dewiong beaiñ kam dei ka subjek jongka sorkar jylla hynrei jongka sorkar pdeng. Namar kano kano ka jingpynkheiñ ïa ka kyndon ba 21 jongka MMDR Act 1957 kata ka aiñ kan ithuh beit na kata ka daw kat ïa kane ka kam ym dei ban shu ïaleh kamkai namar ka dei kaba khia bha haduh katta katta ym dei ban ïaleh drama politik ïa kum kane ka kam. Halor ka jingkynnoh ïoh bynta na ka pisa khaïi beain ïa u drok, kane ruh ka long kawei ka jingkynnoh kaba ka sorkar pdeng ka hap ban shim khia namar la ïohi ïa ka jingioh kurup drok ha kylleng ki bynta ka NE kaba da ki spah spah klur kaba mut ka don ka jingïadonkti kaba ïar bha ha kane ka kam bad ka sorkar pdeng ka dei ban shim khia ïa kane ruh. Kumta u nongkynnoh ruh um dei ban shu kynnoh nangta sa ngap jar noh u dei ban ïai bud dien bad wanrah shakhmat ïa ki jingpynshisha ong u Dr Mukul Sangma.