Thaw rekod ka NorthEast United FC, ha ka sien ba nyngkong khur nam lahduh ha ka Durand Cup

Kolkata, Nailar 31 : Ka kynhun ialehkai jong ka North East United FC ka la ïoh ban thaw ia ka rekod kum ka kynhun ba nyngkong eh na ka thaiñ shatei lam mihngi jong ka Ri ban khur ia ka nam lahduh jong ka Durand Cup hadien ba ka la lah ban pynliem noh ïa ka Mohun Bagan Super Giant ha ka tie-breaker ha ka jingïakhun kaba itynnad bha kaba long ha Vivekananda Yuba Bharati Krirangan, Kolkata.
Haba phai sha ka jingïakhun dei ka Mohun Bagan kaba ïoh ban pynkhih jar nyngkong lyngba ka penlaty ha ka minit kaba 11 jong ka kylla step hadien ba u rangap dien ka NorthEast u la kum pynur ïa u rangïalehkai shakhmat ka Mohun Bagan ha phyllaw kor.
Ym tang katta, ka Mohun Bagan kala ïoh biang ruh ban thep saa shi kol ha ki minit kiba khatduh jong ka kylla step kata ha ka minit kaba 45+5 kaba pynlong ïa ka kynhun ban ïoh lamkhmat haduh 2-0 kol tang ha ka kylla step.
Hynrei dei ynda la poi ka kylla miet ba ka jingïakhun ka la kylla ha kaba ka NorthEast United FC tang hapoh ki lai minit ka la ïoh ban thep ar kol, kata ïa ka kol kaba nyngkong la ïoh thep da u Ajaraie ha ka minit kaba 55 bad ïa ka kol kaba ar pat la ïoh ban thep da u Guillermo ha ka minit kaba 58.
Kumta haduh ban da kut ka por ïalehkai ka jingïakhun ka la neh da ka jingïakhaid haduh ba ki bor pynïaid ki la shim da ka rai ban pynlong noh da ka jingshut tie-breaker.
Dei lyngba kane ka rai ba ka North East United ka la ïoh ban khur ïa ka nam lahduh da kaba pynliem da ki 4-3 kol ïa kane ka lahduh kaba la jop bunsien ha ka lympung Durand Cup kaba dei ruh ka kynhun ba khlainbor tam ha India.