Shisha ym lah ban len bad ka nongbah Shillong ne ka sor Shillong ka dei ka shnong kaba pynngad bad kaba ka mariang kaba kynsai shisha ban im bad ban shong ban sah. Kumba ka dei ruh ka nongbah ne ka Headquarter jong ka jylla ka don ia shibun ki lad jingmyntoi naduh ka khaïi pateng, ka pule puthi bad ka trei ka ktah nalor jong ka imlang sahlang. Hynrei namar jong ka jingkhapngiah bad namar jong ka jingkiewdor jubor jong ki jaka puta ka la buh jingeh ïa shibun ki longïing ban ïaibteng ban shsong ba sah ne ban aibynta ïa ki khun ki kti, kumta ha kine ki khyndiat snem la lah ban ïohi ïa ka jingsdang ban kynriah jaka shong jaka sah nohda kiba bun ki longïng na ki jaka sor kiba long pdeng sha ki jaka kiba kham long rud nong la ka long sha ki thaiñ Upper Shillong, thaiñ New Shillong wat ruh shaduh ki them jong ka Ri Bhoi shaduh ki thaiñ kum ka umsning bad wat shaduh Nongpoh ruh.
Ha kine ki sngi ngi lah ban ïohi ïa shibun ka jingroi jong ka imlang sahlang kum ka jingkiew jong ka jingtip bad jingshemphang, haduh ka jingstad ha ka pule puthi bad ka ïoh ka kot. Ha kiba bun ki bynta jong wat ha ki thaiñ nongkyndong haba la ïoh ban rung ha ki ïing bad jaka sah jong ki briew teng teng ym ithuh shuh la ka dei kumba ha sor ne nongkyndong namar ba ki jingkiew jong ka ïoh ka kot bad ka kyrdan im jong ki briew, namar ba ki ïing ki sem kim ïapher shuh bad ki ïing ki sem kiba don ha ki thaiñ sor bad ha kine ki thaiñ khapsor ne nongkyndong. Ka jingleit jong ki longïing ba na ki thaiñ sor ban buhai shnong sha ki thaiñ nongkyndong ka la ïarap shibun ban kyntiew ïa kiba bun ki thaiñ ha kaba ki shnong ba hangto ki lah ban ïohi ïa ka nuksa jong ka kyrdan rukom im ne ka standard jong ki briew ha kine ki sngi ba mynta.
Ka jingleit buhai shnong jong ki briew kiba na ki thaiñ sor sha ki thaiñ khapsor ne nongkyndong, la ïohi ba ka la long ka jingmyntoi kaba khraw ïa ki ha kaba ki la lah ban ïoh ïa ki jaka bad ki ïing ki sem kiba kham heh bad kiba kham bit kham biang. Khamtam lei lei kito kiba la shongthait na ki kam ki dup ba ki trei bad kiba ieit jingthung ki ïoh ruh ïa ka lad ban rep ban riang bad pynlut por ïalade. Nalor kata ki ïoh ruh ïa ka mariang kaba pyngngad bad kaba lait na ki jingkhapngiah jong ka jingim kaba khim hapoh sor. Katto katne ki longïing ki la pynpaw ka jingsngewtynnad haba ki ïohlad ban mad ïa ki jingkylla ha ka jingim, namar ba kumba ka long mynta ha ki sngi ka leit ka wan kam da dei shuh ka jingeh ïa kiba bun, ngim lah ban len ba wat ki briew ki bym don ïa ki ïing ki sem ruh ha kine ki sngi ki don beit ïa ki kali la jong.
Kiba bun ki briew kiba ju im bad ju sah ha sor ki la ïoh kabu shibun ban die noh ïa ki ïing ki sem kiba khim bad kiba khapngiah jong ki ha ka dor kaba rem bad bun kila ïohlad pat ban thied ïa ki jaka kiba heh bad kiba lylluid ha ki thaiñ khapsor bad lah ruh ban ïasam bynta hapdeng la jong ki khun ki kti. Ka jingim jongki ka lah lehse ka la dei sha ki jaka ba kham long kyndong hynrei ki ïohlad ban thaw pynitynnad bha ïa la ki jong ki ïing ki sem bad don ïa ka kper, ka phylla, ka jaka thung jingthung, ki jaka buh kali bad kumjuh ruh wat haduh ki jaka jngi ne ki Swimming Pool. Shisha ki lah ban ïoh ïa ka surok kim jong ki phareng bad ki lehkmen ban wan teng teng sha sor bad mad pat ïa ka jingkhñium jong ka jingdheng kali bad ka jingkhapngiah jong ka jingim sor.
Ka jingpoi buhai shnong jong ki briew kiba shemphang bad kiba don ïa ka kyrdan ha ka rukom im rukom sah ka ïarap ban ai nuksa shibun ïa kito kiba sngew ba ki dei tang kiba sah ha sor kiba long kiba kham bit khambiang. Hynrei ha kine ki sngi ngi ïohi ba ka jingim jong ki briew wat ha ki thaiñ nongkyndong ruh ka la kylla shibun bad ki la bun na ki kiba long ki riew shephang. Kumta ngi lah ban sngewthuh ba ka la dei ban por ba ngin sngewthuh noh ba ngim dei ban shu ïaleh thma beit ban ïoh leit sah sha sor Shillong, hynrei ngi donkam ban kyntiew ïa la ki jong ki dong ki thain khnang ba kan long ka jingphyrnai bad ka burom ïa ka imlang sahlang bad ka jaidbynriew hi baroh kawei.
Namar kata ka long kaba donkam ïa ka sorkar bad ki nongmihkhmat paidbah ban peit ba baroh ki don ki thaiñ kin ïoh ïa ki lad pynroi, khamtam lei ki skul bad ki jaka pule kiba ïaryngkat kyrdan, khnang ba ki paidbah sha ki thaiñ nongkyndong kin ïoh ïa ka jingmut ba ym dei eh ban ïabeh tang sha sor. Kane kan pyllait ruh na ka jingkhapngiah jubor jong ka sor bad kan wanrah pat ïa ka roi ka pa kaba dei biang wat sha ki thaiñ nongkyndong. Kumta ha kawei ka sngi ngin lah ban ïohi ba yn ym don shuh ki shnong ban ngin dang nud ban khot nongkyndong ïa ki, namar ba ki lah ban long ki shnongkiba kham paw pynban wat ban ïa ki shnong ba ha sor ruh.
