Haba ngi shimti ïa ka KHADC, ngi shimti ruh ïa ki kynrum kynram ba shyrkhei: Winston Tony Lyngdoh

Nongstoiñ, Jymmang 25: Ka seng Voice of the Peoples Party ka la ïai bteng ban hiar sha ki shnong ki thaw kylleng ki jaka kynthup ïa ki jaka khappud kum ha ki thaiñ Ri Muliang bad Langpih, ban pynshai paidbah halor ki mat ki jura kaba long ruh kum shi bynta jong ka jingpynkhreh na ka bynta ka MP elekshon shiteng samoi.
Ha Langpih, ka jingïalang paidbah la pynlong ha ïew Langpih ha kaba la ïohi ruh ba da ki spah ngut ki briew ki la mih paidbah ban sngap dngong ïa ki kyntien kaba la ai jingkren jong ki nongïalam jong ka seng.
U bah Winston Tony Lyngdoh haba ai jingkren ha katei ka sngi, u la wer ïa ki paidbah ban ai jingkyrshan biang sa shisien ïa u kyrtong Dr Batskhem Myrboh jong ka seng VPP, ba un poi sha ka thong bad ba un ïoh ïa ka jingjop ba don burom, namar kane ka kynti ka dang dei ka pali jong ka VPP ban pynkut ïa ka 5 snem.
“Ngi la ïoh ban sei ïa une u kyrtong u ba biang eh na ka bynta ka elekshon MP, kumta to wat ym long kiba artatien lane jingtieng jingsmiej ha ki jingmut jingpyrkhat. Hynrei ban ieng skhem tang kawei ka jingmut ban ai ka jingkyrshan kaba pura ïa u Dr Batskhem Myrboh ha kane ka elekshon”.
“Ha ka jingïaid lynti ka jong ngi kum ka party kaba dang shen, ngi la hap ban ïaid ha ryngkat shibun ki jingeh. Hynrei tang kawei ngan ong ïa phi ba naduh ka sngi ba ngi sdang ïa ka party, baroh kiba donkti bad ngi, ngi don tang kawei ka sur bad kata ka long ngin ym don ka mynsiem ka jingsheptieng haba ngi kren lane pyni ïa ki jingeh ba ka jaidbynriew ka ïakynduh haduh kine ki sngi ba mynta”.
“Ngi mih ngi rung na kawei ka jaka sha kawei ka jaka ban pynsngewthuh bad pynshai ïa ki paidbah ïa ka jingeh kaba ngi ïai mad. Ha ka lynti ïaid ka jong ngi, kin dang bun ki jingeh ki dang bun ki jingtynjuh, hynrei kum ki nongkyrshan kiba skhem jong ka VPP da lei lei ruh ngin ym kynran dien. Da lei lei ruh ngin ym shongthait bad ngin ym ailad ïa ki bor jong u bymman ban wan tyllep ïa kane ka ri baieit jong ngi”.
“Kum ki nongïalam jong ka VPP ngi ngeit skhem ruh ba lyngba ka jingkyrshan jong phi ki paidbah nongshong shnong, kan ïai ai mynsiem ba ngin nang lah ban trei bha shuh shuh ha kine ki sngi ki snem ki ban wan”.
“Haba ngi shimti ïa ka kam ha District Council, ngi shimti ruh ïa ka kynrum kynram kaba shyrkhei haduh katta. Shi snem kynthih ngi la ïoh ban ïa don bad ka EC ba ngi la ïoh ban pynbeit ïa ki kam ki jam ki jong ngi. Ngi la hap ban ïaid ïa ki lynti ïaid kiba eh, hynrei kum ki nongïalam ngim shym la randien. Ha ka jingïaid lynti jong ngi ban pynbeit ïa ki kynrum kynram bad ki jingeh, ngi ieng skhem kum ki MDC ban shim ïa ki rai kiba dei kumba ki paidbah ki la bynshet ha ïa ngi ha District Council”.
Shuwa ban pynkut ïa ka jingïalap elekshon bah Winstone Tony Lyngdoh, u wer ïa ki paidbah ban wan ïeng shakhmat ïa ka ban pyrta lang ha u Prah, ha kaba ki paidbah naduh ki longkmie longkpa ki la mih shakhmat ban ïa pyrta lang ha u Prah.
Ha katei ka sngi la ïadonlang ruh naduh u bah Juristman Ïawphniaw MDC ka Nongstoiñ Constituency, bah Powell Sohklet MDC ka Mawthadraishan, bah Winston Tony Lyngdoh bad kiwei kiwei kiba la ïoh ban ai jingkren lang ha katei ka jingïalang.