Ka Nongkseh ïa ka Shkenshynriah, ka Langsning pyrshah ïa ka Lajong ha ka semi final jong ka MSL

Shillong, May 26: Ka Rymbai Shkenshynriah SC ka la bud lang ïa ka Langsning FC na ka Group B ban rung sha ka semi-final jong ka 5th Meghalaya State League hadien ba la pyndep ïa ki jingïalehkai ba khatduh jong ka quarterfinal league stage ha SSA Stadium mynta ka sngi.
Ka Nongkseh SSCC kaba la wan nyngkong ha Group A bad ka Shillong Lajong FC kaba wan ba ar ruh ki la rung sha ka semi-final, kaban long ha ka 29 bad 30 tarik u Jymmang mynta u snem. Ka jingïakhun ïa ka final ha kane ka lympung ïalehkai phutbol kaba heh tam ha ka jylla kaba la maitphang da ka Meghalaya Football Association ryngkat ka jingïatreilang bad ka Directorate of Sports and Youth Affairs, kan long ha ka 04 tarik u Jylliew.
Haba phai sha ka jingïakhun ha kane ka sngi, ka Shkenshynriah ka donkam tang ïa ka jingïakhaid ban rung sha ka semi-final hynrei ka la lah pynban ban jop pynban haduh 5-2 kol ïa ka Nangkiew Irat SC. Baroh hynñiew tylli ki kol la thep ha ka kylla miet, ha kaba u Ïaishah Bareh (56’), Hesmiki Rymbai (69’, 90’+3), Niponghi Sumer (77’) bad Harita Suchen (90’+4) ki la thep na ka bynta ka Shkenshynriah, katba u Brolington Warlarpih (58’) bad u Justerwell Tham (81’) ki la thep na ka bynta ka Nangkiew.
Ha ka jingïakhun ha ka kylla step ka la kut khlem da don mano mano ban ïoh thep kol hynrei ka jingïalehkai ka la khie im ha ka kylla miet, ha kaba u Ïaishah u la ïoh ban pyllait suk ïa ka bol na u Emerald Dan rangap kol jong ka Nangkiew bad mareh stet shakhmat ban thep kol.
U Hesmiki u la pyntam biang ïa ka Shkenshynriah katba u Niponghi u la pynlong ïa ka kynhun ban ïoh tam da 3-1 kol lyngba ka free-kick kaba paka na kyndong jong ka phyllaw kol. Ka kol na u Justerwell ka la pynlong ïa ka Nangkiew ban ïoh mynsiem biang hynrei ka Shkenshynriah ka la thep sa ar kol ha ka por ba jan kut artad ka por ïalehkai kaba la pynkmen shikatdei eh ïa ki paidbah nongkyrshan jong ka.
Da kane ka jingïajop, ka Shkenshynriah ka la pyndep da 12 point katba ka Nangkiew ka la wan ba lai da 9 point.
Ha ka jingïalehkai kaba nyngkong pat, ka Langsning ka la pynthikna ïa ka kyrdan ba nyngkong ha ka group da kaba pynliem ïa ka Maram FC kaba don trai duh da 2-0 kol. U Donlad Diengdoh (41’) bad u Nelson Rymbai (48’) ki la thep mar kawei ka kol ha shuwa bad hadien ka kylla step ban pyntikna ba ka kynhun kan khur suk ïa ka jingjop.
Ka Langsning ka la rung sha ka semi-final da kaba jop san sien bad rem tang shisien, kaba la ai ïa ka 15 point, kaba long kaba bun tam hapdeng baroh ki kynhun ha baroh ar tylli ki group quarterfinal. Na ka bynta ka Maram, kane ka dei ka jingshah rem kaba hynriew hynrei ka jingïashim bynta ha kane ka league ryngkat bad ki kynhun kiba tbit tam na kylleng ka Meghalaya kan ai jingmyntoi bha ïa ka katba ka dang pynkhreh ban ïada ïa ka nam lahduh jong ka ha ka Tura Super Division.
Baroh ar tylli ki jingïalehkai semi-final la buh ban long ha ka por 6 baje janmiet ha SSA Stadium. Ha ka semi-final kaba nyngkong, ka Nongkseh kan ïakhun pyrshah ïa ka Rymbai Shkenshynriah ha ka 29 tarik u Jymmang bud sa ka Langsning pyrshah ïa ka Lajong ha ka sngi kaba bud.