Leit jurip ka Assurances Committee jong ka Iing Dorbar ïa lai tylli ki projek ïalehkai kiba heh tam ha ka jylla

Meghalaya, Jymmang 26 : Ka Committee on Government Assurances jong ka Iing Dorbar Thawain ka Jylla hynne ka sngi Ba-ar ka la leit ban jurip ïa ki lai tylli ki projek ba pyntreikam da ka sorkar jylla kiba kynthup ïa ka Indoor Stadium ha Umsawli, ka Mawkhanu Football Stadium bad kumjuh ki jingtei ïa ki jaka ïalehkai hapoh um (Water Sports Facilities) ha Umtham, Ri-Bhoi District.
Ïa ka kynhun la ïalam da u Chairman ka Committee bad MLA ka Mawkyrwat Bah Renikton Lyngdoh Tongkhar nangta ka Dr. M. Ampareen Lyngdoh, MLA ka East Shillong, Dr. Celestine Lyngdoh, MLA ka Umsning, bad Bah Ollan Singh Suin, MLA ka Mawsynram kum ki dkhot. Ki ophisar kiba la don ha kane ka jingleit jurip ki long u Sanjay D Shira ba dei u BDO jong ka Mawryngkneng Block, u Bah Manhiam Marbaniang, Chief Engineer (Sports) bad ki nongmihkhmat na ka kompani kaba tei ïa ka football stadium.
Haba kren hadien ba la dep ban jup na ka liang u Chairman jong ka Committee u la pynpawe ïa ka jingsngewkmen ban ïohi ba ïa madan phutbol kaba heh tam ha India yn tei ha kane ka jylla.
“Ngim dei ban klet ban ai khublei ïa u Myntri Rangbah ka jylla, Conrad Sangma, namar ka jingïalam lynti jong u ban wanrah ïa kane ka projek sha Meghalaya,” u la ong.
U Chairman ka Committee u la pynpaw ïa ka jingsngew hun halor ka jingïaid shaphrang jong ka kam bad ong ba la khmih lynti ba ïa kane ka projek yn pyndep ha ka por kaba la buh.
Katkum ka tender, ïa kane ka stadium football kaba don 40,000 tylli ki jaka shong jong ki paidbah nongwan peit kai la buh thong ban pyndep ha ka bynta kaba khatduh jong u snem 2028 bad ïa ka projek la pyntrei da ka KPC Projects Limited.
Halor kane ruh u Chairman u la ong ba u sngewkmen ban ïohi ïa ka jingïaid shaphrang jong ka New Shillong, khamtam ha ka liang ka surok bad ki jingtei paidbah. “Ka la pynkyndit ïa nga bad ïa kiwei ki dkhot ban ïohi ïa ka jingïaid shaphrang ki kam pynroi ha ha New Shillong,” ong u Bah Renik.
Ka Committee ka la leit jurip ruh ïa ka Water Sports Centre ha Umtham bad ka Tennis Court ha Umsawli.
U la bynrap ba u kyrmen ba baroh ki projek kiba dang pyntrei ha New Shillong yn lah ban pyndep ha ka por kaba la buh khnang ba ki paidbah kin lah ban pyndonkam ïa ki jingtei kiba dang shna.
Ka Mawkhanu Football Stadium ka dei ka stadium kaba heh tam ha ka jylla bad ha ka Ri kaban ngiam haduh kumba 40,000 ngut ki nongpeit kai bad mynta ka jingtei ka dang ïaid shaid shaid ha Mawkhanu, New Shillong. Ïa kane ka projek kaba kot haduh 732 klur la pyntrei da ka Sorkar Meghalaya kum shi bynta ban pynlong ïa ka jylla kum ka jylla kaba pawnam ha ka phutbol ha ka Ri.
Haba phai pat sha ka projek ïalehkai ha Umtham, haduh mynta ka dang kylla long ka jaka pdeng jong Meghalaya ha ki jingïalehkai jingïaid um la ka long naduh ka ïakob niah lieng kata la ka long ha ka river canoeing, kayaking bad rafting.