Palat 2000 tylli ki Transformer ba thymmai yn buh ha kylleng ka jylla ban biang ka bording

Shillong, Jymmang 25 : Palat 2000 tylli ki transformer ba thymmai yn sa buh ka tnad pynmih bording ha kylleng ki bynta ka jylla khnang ban biang ka jingïoh bording ki paidbah khlem kano kano ka jingpynthut, ïathuh u Commissioner bad Secretary ka tnad Power u Sanjay Goyal.
“ Ngin sa buh ha kylleng ka jylla palat 2000 tylli ki transformer khnang ba kan biang ka rukom pynpoi ding sha ki paid nongshong shnong bad lyngba kane ka jingtlot ka bor ding ( low votage) ruh kan lait noh”ong u Goyal.
U la ong kane ka long kum shi bynta na ka jingpynkhlaiñ ïa ka bording ban ym ud shuh ki paidbah.
Baroh shi katta ki don ki jingujor ïa ka jingtlot ka bor ding bad mynta ngin pyrshang katba lah ban pynbiang ïa ka jingdonkam ki paidbah khnang ban lait ka jingpynlip bording ba khah khah bad la kyrmen ba kane kan lait hadien ba la dep buh ïa kine ki transformer” ong biang u Goyal.
Ka jingshna ïa ki laiñ bording mynta ka dang ïaid bad ka jingpynthymmai ïa ki sainar bording ruh ka la nang ïaid ha ki dong bad shnong bapher bapher. Ha kane ka jingshna pynbha ha ki jaka ba i donkam ban buh da ki sainar kiba thymmai ruh yn buh bad lada donkam ban dang pynbun ïa ki transformer ruh yn leh ïa kata.
Kumba long mynta u la ong ba kam don ka jingduna bording bad mynta lei lei ba la poi ka lyiur kyrmen skhem ba ki paidbah kin ym mad ïa kine ki jingeh.