Shillong, Jymmang 07 : Ka Wapung Block kan sa mihkhmat ïa ka East Jaiñtia Hills District sha ka State Level Chief Minister U-12 Football Tournament 2023 kaban sa long ha ka 11 tarik Jylliew 2023. Ka Wapung Block kan sa mihkhmat ïa ka Eat Jaiñtia Hills hadien ba ka la ïoh rah ïa ka nam lahduh ha ka District Level Chief Minister U-12 (Boys and Girls) Football Tournament 2023 ba la pynïaid da ka District Sports Officer EJHD. Katei ka lympung ïalehkai ka la kut noh ha ka sngi Saitjaiñ (6-5-2023) da ki jingïalehkai phainal ha madan Deinchynrum.
Ha ka phainal jong ki kynthei ka Wapung Block ka la ïakhun pyrshah ïa ka Jalaphet Zone Saipung Block ha kaba ka Wapung Block ka la jop da 1-0 kol, ïa kaba la thep da ka Larisha Lyngdoh ha ka minit ïalehkai ba 37 jong ka jingïalehkai.
Ha ka liang ki shynrang ka Wapung Block ka la pynliem ïa ka Lumshnong Block da 3-1 kol. Ïa kitei ki lai kol la thep da u Lazio Dkhar uba la thep ar kol ha ka minit ba 10 bad 46, u Khroobormi Sutnga u thep ha ka minit ïalehkai ba 13 katba ïa ka shi kol na ka bynta ka Lumshnong la thep da u Ennocent Mylliem ha ka minit ba 17 jong ka jingïalehkai.
Ha kane ka sngi la wan ban sakhi lang u Additional Superintendet of Police ka East Jaiñtia Hills District u Bah Banraplang Jyrwa kum u Kongsan, u Rangbah Shnong ka Deinchynrum u Bah Welbert Nongtdu kum u symbud kongsan.
La ïadonlang ruh ka District Sports Officer, ki nonghikai skul, ki dkhot jong ka East Jaiñtia District Sports Association lem bad ki grassroot coach na ka office DSO jong ka District. Kiba jop mynta kin mih khmat ïa ka District ban leit ïakhun sha ka State Level ka ban long ha ka 11 tarik u Jylliew 2023.
