K a jingdon jong ki Bank ka long shisha ka jingïarap kaba khraw ym tang ïa ka imlang sahlang, hynrei khamtam eh ïa ka kam ban kyntiew bad kyrshan ïa ki kam khaii bad lad kamai. Hynrei khyndiat eh la lah ban ïohi ïa ka jingiadonbynta jong ki Bank ha kaba ïadei bad ka imlang sahlang ha kaba iadei bad ka jingpynïar shuh shuh ïa ka rukom shakri jong ki sha ki paidbah khamtam lei kito kiba trei ha ki kam khaiï. Namar ba kat kumba ka long haduh mynta la ïohi ba ka kamram jong ki Bank hi ka long eh tang ban pynbuh pynsat lem ïa ka jingdon jingem jong ki paidbah bad nangta da kata hi ka spah kaba la lum bad kynshew da ki paidbah la pyntyllun pat ïa shibun kiwei ki kam khamtam eh kaba pynïoh ram sha kito kiba kwah ban pynheh ne sdang ïa ki kam khaii jong ki.
Ka State Bank of India ka dei kawei na ki Bank kaba la rim eh, kaba la shaniah da baroh bad ruh kaba bunkam tam ha ba ïa nujor bad kiwei pat ki Bank. Hooid kine ki Bank ki la rung sha jan baroh ki kyndon kynshrot ban pynïoh ia ka jingshakri kaba donkam sha ki paidbah ha kaba ïadei bad kaba pynlum pynlang ia ka pisa tyngka bad ruh ïarap ban kyrshan ram sha kito kiba donkam ia kata. Hynrei ym baroh ki briew ki shlan ban shim kabu na ka jingiarap jong ki Bank namar ba ki don shibun ki jnit ki jnat kiba ki paidbah kin hap ban pynbiang khnang ba ki Bank kin lah ban ïarap ne ban kyrshan ram ïa ki. Kumta na ka bynta ki briew ki bym pat da shemphang eh ka long kaba eh ba kin lah ban pynbit pynbiang ïa ki jingdonkam jong ki Bank khnang ba kin lah ban ïoh ïa ka jingiarap pisa ne ka ram.
Kan long ka jingïarap kaba khraw lada ki Bank ki shim khia ban wanrah ïa ki lad jinghikai sha ki paidbah na ka por sha ka por bad ruh ban ïai pynlong ïa ki prokram kiba kyrpang shaphang kumno ba ki paidbah kin lah ban pynheh ïa ki kam ki jam jong ki ha kaba ïadei bad ka kam khaiï. Ha ka jingïashem bad kiba bun ki nongkhaiï kiba rit ba ria ki pynpaw ba kam dei kaba suh ïa ki ban leit sha ki Bank, hynrei lada ki Bank ki plie ïa ki lad ki lynti ban wanrah ïa ki lad jinghikai kiba long paidbah kan long ka jingmyntoi kaba khraw.
Ki paidbah khmatam kito ki nongkhaiï barit ba ria ki donkam ban tip ia ki lad bad ki lynti kumno ba kin lah ym tang ban lum ban lang, hynrei khamtam eh kumno ba kin lah ban pyniaid kham janai ia ki kam khaiï jongki lyngba ki lad jinghikai ba ki ïoh. Shisha ki nongseng kam rit kam ria ki donkam eh ban sngewthuh khambha ha kaba ïadei bad kumno ban pynïaid bad pyntyllun ïa ki kam. Naduh kumno ban buh jingkheiñ jingdiah, kumno ba kin nang ban don ka jingiadei kaba jan bad kito ki briew ne ki kompeni kiba lah ban kyrshan mar ïa ki. Kaba kongsan ka long ba kin don ia kata ka jingtbit ha ka die ka thied bad kan don ka jingïadei kaba jan bad baroh kiba ïadon bynta bad ka kam khaii jong ki.
Ka jingshim khia jong ki Bank ban wanrah ïa ka jingshemphang ne kata ka Ecomomic Awareness sha ki nongkhaiï kiba rit ba ria khlem pep kan lah ban kyntiew shuh shuh ïa ka ïoh ïa kot ym tang ha ki jaka sor hynrei wat ha ki thaiñ nongkyndong ruh. Khamtam lei ha kane ka juk jong ka jingstad technology ka jingai jinghikai sha ki nongkhaii ba rit ba ria kan iarap shibun ia ki ban suk ïa ïadie ia thied. Wat ka jingmih jong ki app kiba bun jait ha kaba ïadei bad ka rukom siew ka la ïarap shibun eh ia ki paidbah nongleit nongwan hynrei kane kam pat poi lut sha baroh kito kiba donkam ban pyndonkam ïa ka.
Kumta ki Bank ki donkam ban shim khia ban wanrah sha ki paidbah ia kata ka jingshemphang ne ka awareness khnang ban pynsuk ïa baroh bad ban lah ban nangkiew stet ha ka roi ka par ym tang ha ki don ki shnong, hynrei ha ka jylla bad ruh ka ri baroh kawei. Ki don shibun bah ki lad ki lynti kiba ym lah ban ñiew tang lut kiba ka Bank ka lah ban iarap na ka bynta ki paidbah ban kyntiew ïa ka roi ka par.
