Ka surok ka dei u budlum ka ïoh ka kot bad jingsuk ka leit ka wan na ka bynta ki nongshong shnong bad nongleit nongwan. Haba ngi kren ïa katei ka phang jong ka jinglong jingman ka surok Mawphlang-Lyngïong-Tyrsad tang shu noh na Mawphlang ter ter ka ban poi shaduh Weiloi bad na Weiloi ka ban lad sha Mawsynram, Lawbah, Balat, Ranikor bad sha Mawkyrwat. Katei ka surok katkum ka jingkylla ki por ka lah sdang ban khapngiah bad donkam ban pynheh noh ïa ka, namar ka jingkiew ki kali kiba ïaid lyngba katei ka thaiñ man la ka sngi ka long da ki spah tylli bad lah ban poi ruh sha ki hajar.
Kum uwei na ki trai shnong ka thaiñ ngi kynmaw ba ha ki por ba dangrit ka shimpor da ki kynta ban ïohi ia ki kali ki ban ïaid lyngba katei ka surok khamtam ha ka them Lyngïong-Tyrsad. Bunsien hi ngi sakhi ïa ki kali ha ka por mynstep haba ki kiew sha Shillong na ki shnong bapher bapher na ki thaiñ Ranikor, Mawkyrwat, Mawsynram, Balat, Lawbah bad kumjuh na katei ka thaiñ, nangta ha ka por janmiet haba ki leit phai sha la ki shnong jong ki.
Kaei kaba ngi sakhi ha kine ki sngi katkum ki jingkylla ka por ka long ba ka shimpor tang da ki minit ban ïohi ïa ki kali kiba ïaid lyngba ka surok ha katei ka thaiñ kiba wan bad leit kylleng sawdong ki shnong kiba hap khamtam ha ki saw tylli ki konstitwensi ba kynthup ïa ka Mawphlang, Mawsynram, Mawkyrwat bad Ranikor. Kane ka jingsdang bun ki kali kiba ïaid na kane ka surok ha ka thaiñ ka la sdang ban wanrah ïa ka jingkhapngiah bad buh jingma ruh ïa ki nongleit nongwan khamtam ïa ki heprit kiba ïaid lynti ha katei ka surok ha ki shnong ka thain. Ha teng ha teng ka la sdang ka jingdheng kali kaba kum ka thaiñ ngim pat mad ha ki snem kiba la leit khamtam haba don ki jingtrei kiba ïa dei bad ka surok kum ka jingshna ïa ki muri ne ki culvert bad kiwei kiwei ki bynta. Kane ka dei ka dak ba lah donkam ban pynheh noh ïa katei ka surok ha ka thaiñ na bynta ka jingbit jingbiang ki nongleit nongwan bad nongshong shnong.
Ngi ïohi ïa ka jingpynpaw ka sorkar ban pynheh bad pynbha noh ïa katei ka surok ka thaiñ naduh Mawphlang shaduh Mawsynram, ngi kyrmen ba katei ka jingthmu kan pynurlong ïa ka jingthrang ki paidbah ka thaiñ kiba ju ïa kren na ka por sha ka por ba lah donkam ban pynheh bad pynbha noh ïa katei ka surok. Kane ka dei ka jingai jingmut ban ïatei, katkum ka jingïohi ïa ka jingdonkam bad jingkylla ka por kum u trai shnong kaba long ruh ka sur ki nongleit nongwan. Lada kane ka jingthrang ki paidbah ka urlong kan long shisha ka jingkmen ïa kiba bun balang.
