Nongpoh, Naiwieng 14: Ka long ka jingsarong bad ka burom ym tang ïa ka Ri Bhoi District bad ka jylla bad ka long ruh ka nam bad ka burom ïa ka ri India hi baroh kawei, ha kaba kawei ka samla na Ri Bhoi ka la shah jied ban leit mihkhmat ïa ka ri India na ka bynta ban leit aireng ha kawei ka lympung ïakhun kti ka pyrthei ka ban long ha ka ri Uzbekistan.
Kane ka jingïakhun kti ban wan shim bynta da ki nongïakhun kti (Arm Wrestlers) na kiwei ki ri ka pyrthei ka dei ka la pynbeit ban pynlong naduh ka 17-25 tarik u Naiwieng 2023 la tip kum ka ‘Asian Arm-wrestling Cup’ ha kaba ka rynsan ïa khun kti kan long ha ka ri Uzbekistan.
Kane ka samla ba la shah jied na Ri Bhoi ban leit shim bynta sha katei ka lympung ka dei ka samla Senibi Syngkli na ka Shnong Lumdieng, Umden ha Ri Bhoi.
Kum ban pynkynmaw, kane ka samla dang shen ruh ka la ioh khur ïa ki ar tylli ki takma ksiar bad 2 tylli ki takma rupa ha ka jingleit shim bynta ha ka 45th National Arm-Wrestling Championship 2023 kaba la dang shu dep ha ka jylla Jammu and Kashmir.
Kum ka jingsarong ïa kane ka samla kaba don ka sap kaba kyrpang ha ka jingïakhun kti (Arm Wrestling), ka seng Meghalaya People’s Social Organization mynta ka sngi shuwa ba kane ka samla kan leit shim bynta sha katei ka lympung ka la ai ka jingkyrkhu kyrduh bad ruh ba kyrshan da ka song pisa shibynta ban ïarap lem ïa kane ka samla kaba dang donkam shibun ki jingkyrshan haba leit ban shim bynta ha katei ka rynsan ïa khun kti sha kiwei ki ri.
Na ka liang ka President ka MPSO, ka Kong M. Wanniang ryngkat u hymmen jong katei ka samla u Bah John Syngkli mynta ka sngi ki la ai ka jingkyrkhu kyrdoh ïa kane ka samla . Ha kawei ka bynta ki la kyrpad ruh sha ka sorkar ba kan phai khmat lem sha kum kine ki samla, namar ban leit shim bynta sha kum kine ki rynsan ka donkam ruh ka jingkyrshan na ka sorkar namar bun ki jingdonkam ba tang ka ïing ka sem kin nym lah satia ban kyrshan ïa ka.
