Kam dei ka sien ba nyngkong ba ka la jia hynrei na ka por sha ka por kala jia ka jingshah tynrah ki briew kiba ïaid lynti ha ki thuk thuk ne ha ki scooty bad ka daw ka dei beit namar ka jingñiah ne pynher sted palat jongki nongñiah kaba la poi sha ki jingjia ba sngewsih.
Dang ha kine ki khyndiat bnai uwei u khynnah skul ula shah rat ha ka thuk thuk hajan Don Bosco Square ha ka por ba u dang mut ban jam na shilliang sha shilliang ka surok. Dang hynnin pat ka janmiet sa kawei ka jingjia ba sngewsih kaba la jia ha Mawlai Mawdatbaki,Lad Umjan ha kaba kawei ka longkmie ka la duh ei kyndit kyndit ïa la ka jongka jingim tang namar ba shah tynrah ha ka thuk thuk na ka jingñiah khlem akor bad pynher sted palat jong uwei u samla lud uba dang 18 snem ka rta.
Ha ka jingshisha ki kyndon aiñ ki la don lypa ba ym bit ban ñiah sted palat ïa ki kali be thuk thuk ha sor namar ki bun ki briew kiba ïaid ba ïeng bad khamtam ki khynnah skul ha ka por wai skul. Hynrei la ïohi na ka por sha ka por ka rukom ñiah thuk thuk bad scooty ka long khlem akor ha kaba ki nongñiah kim ju salia ki pynsum beit ïa ki thuk thuk bad scooty jongki la i kumba ki beh kyrkieh shano re shano hynrei ha ka jingshisha kam dei kumta hynrei ka dei tang ka jingñiah kyreit bad jingñiah khyllew ha kaba kim sngewthuh wat ïa ka jingim jongki ki buh haka jingma bad kumjuh ïa ka jingim jong kiwei ki briew ruh.
Hooid hadien kane ka jingjia hynnin ka janmiet kaba la wanrah ka jingkhlad noh jongi longkmie na ka liang ki bor sorkar ki la shim ïa ka rai ban bthah ïaki bor pulit ban leh da kaba tyngeh bad mynta ka shong ha ki bor pulit namar ki pulit pynïaid kali kiba don man la ki jaka ki don beit la ki walkie talkie bad haba ki ïohi ïa kiba niah sted ïa ki thuk thuk bad ki scooty lada kim ïoh bat ha ka jaka ba ki don ki dei ban pyntip noh sha kito kiba don ha kawei pat ka police point khnang ba kin ïoh bat ïa kum kito ki nongñiah thuk thuk ba shu ñiah khlem akor bad pynher sted. Ki pulit ki dei ban shim khia ïa kane namar lada kim leh ei ei kin dang don bun ki jingjia kiba lah ban jia khamtam lei lei ha kane ka juk ba jyllei u drok mano ban tip ïoh kito kiba ñiah khyllew bad kyreit kim sngewthuh shuh ïa lade namar la shoh ka jingpynbuaid na u drok ne ka kyiad.
Ki pulit kim dei ban pyrkhing ïa ka jingtalasi ym tang mynmiet hynrei ki dei ban pyrkhing mynsngi eh khamtam namar kiba bun kiba ïaid ba ïeng ki dei mynsngi khamtam ha ka por ba wai skul bad wai ophis. Ka jingpyrkhing kam dei ban long tang ha sor hynrei wat ha ki surok bah ruh. Namar teng teng ki ong ba leh khlem akor ki trok sa jia ka jingtakhuh ne aksident hynrei teng teng ka dei ka jingñiah khlem akor hi jong kiba ñiah thuk thuk bad scooty ba la shu pynher sted shaba palat ba ym lah shuh ban teh lakam ïa ka thuk thuk ne scooty jongki ba sa poi sha ki jingjia ba sngewsih.
Kumta khnang ba ka jingim briew kan ym mad ïa ki jingjia ba sngewsih kata lada ïa kiba ñiah ne kiba ïaid ba ïeng ruh ki pulit nangne shakhmat ki dei ban da pyrkhing shisha bad tang shu ïohi ïa kito kiba ñiah sted palat pud ki dei ban bat bad daiñ kuna beit ïa ki khnang ba kan long ka jingsneng ïa kiwei ruh ba kin ym myllien shuh ban ñiah sted palat pud haba ki ñiah. Wat ki Dorbar Shnong ruh ki don ka hok ban kem bad bat ïa kito kiba ñiah thuk thuk, scooty ne kali hapoh ki shnong ki thaw khlem da kheiñ snep ïa ka jingim briew da kaba shu ñiah sted shaba palat pud. Kumta sa shisien ha kane ka bynta ruh ki Dorbar Shnong ki dei ban ïatrei lang bad ki bor pulit khnang ba tang shu ïoh bat ïa kiba ñiah sted beaiñ, dei ban aiti pat ïa ki sha ki bor ka aiñ ym dei ba ki Dorbar Shnong kin shim ïa ka aiñ ha kti jongki namar kiba dei ban pynshitom kat kum ka aiñ ki dei tang ki briew jongka aiñ hi.
