Shillong, Naiwieng 14 : Ka kynhun ïalehkai U-19 jong ka Shillong Lajong FC ka la pynliem haduh 4-0 kol ïa ka kynhun ïalehkai jong ka SAIL, Bokaro ha ka lympung ïakhun jong ka Oil-DFA All India Level Under – 19 Inter Academy Invitational Football Tournament 2023 kaba long ha Duliajan, Assam.
Ha kane ka jingïalehkai tang u Deibormame Tongper u la ïoh ban thep haduh lai kol bad ïoh ruh ïa ka khusnam ‘player of the match’ katba ïa kawei pat ka kol la ïoh ban thep da u Nakul Ajay.
Da kane ka namjop mynta, ka Shillong Lajong U-19 ka la ïoh ban jop baroh ar tylli ki jingïakhun na ka Group bad ka la ïoh ban rung sha ka semi final.
