Shillong, Naiwieng 17 : Ka Rong Biria Seng Kut Snem 2026 ka Seng Khasi Kmie, ka la ïoh ba kan sakhi ïa ka jingïakhun kaba itynnad bha bad kaba ïakhaid bha hapdeng ki shipara na ka kur Rynjah ha ka ïakob siat ki 96 tylli ki kynhun, kaba la long ha ka 15 tarik Naiwieng 2026, ha madan Second Ground, Polo.
Ïa kane ka jingïakob baroh kawei la pynïaid ïa ka da ka Rongbiria Seng Kut Snem Komiti, ka Seng Khasi Kmie. Ha kane ka jingïakob, ki shi jur ki rangbiria na ka kur Rynjah ki la mih madan ba kin ïakhun na ka bynta ka Lumshyïap Langkyrding A&B, ha kaba u Banshanskhem Rynjah bad u Pynbhakupar Rynjah ka Lumshyïap Langkyrding ‘A’ ki la lah ban pynliem noh ïa u Pynshaiboklang Rynjah bad ïa u Nishan Rynjah ba la mihkhmat ïa ka Lumshyiap Langkyrding ‘B’.
Katba ki kynhun ba wan ba-lai ki long ka Laitkyrhong C ba la mihkhmat da u Chesterling Kharumnuid bad Teborlang Warbah bad kumjuh u Abelstar Dkhar bad Aibanshanbor Paliar na ka Hima Nongstoin.
Haba phai pat sha ka ïakob siat kaba para marwei, hangne ruh kane ka jingïakob mynta u snem ka la sei madan ïa uwei u khynnah ba la tip kyrteng kum u Wanpynshngain Kharkongor napoh ka shnong Swer uba la wan ban bat ïa ka kyrdan kaba ar napdeng ki 275 ngut ki rangbiria kiba la mih madan ban ïakhun ha kane ka lympung.
Ïa ka nam ba nyngkong ka la leit sha u Bhakupar Syiemlieh ka Sohrarim bad ka nam kaba-lai ka leit sha u Solan Mawlong ka Tyrsad Nongmadan.
Kumba ka juh long ha shwa ban sdang ban pyntyllun shakhmat ïa ka sngi jong ka jingïakob, ka la don shwa ka jingkyntiew ïa ka lama ka Seng Khasi da u President u Rgh O. Pyngrope bad la ïoh ruh ïa ka jingkren kaba la ai a u Rgh P.D Nongrum Vice President Seng Khasi Kmie bad hadien kane, la leit bad sha ka nguh ka dem kaba la pyndep ïa ka da u Riew Tymmen Riew San Seng Khasi Kmie u Rgh Skor Jala.
Ha ka por janmiet pat, u kongsan ba la wan ban ïa don lang dei u Rgh. K.T Marbaniang, trai ka Shillong Hyundai, ryngkat ki dkhot ka Jylli Pyrkhat Kam Seng Khasi Kmie, bad kumjuh ma EMH Passah Vice President Sein Raij Jowai bad kiwei kiwei.
Ïa ki khusnam jong kane ka jingïakob kadei kaba la ïarap ban noh synniang pat ïa ka da ka Centre Point Group of Enterprise.
La pynkut ïa kane ka jingïakob da ka jingsam ïa ka khusnam pisa sha ki nongjop bad ban pynbud da ka jingpynhiar ïa ka lama ka Seng kum ka dak ba la pynkut ïa kane ka rongbiria da u Genl. Secretary Seng Khasi Kmie u Rgh Hainess Marbaniang.