Lympung I League : Watla ïakhaid mar 2-2 kol, hun jrut ki paidbah ïa ka rukom ïalehkai ka Shilong Lajong ha madan Polo

Shillong, Naiwieng 14: Sa shi sien pat ka Shillong Lajong ka la bteng ïa ka lynti ïaid da ka jingïakhaid ha ka lympung ïalehkai I-League 2023-24, bad mynta ka kynti ka long pyrshah ïa ka Sreenidi Deccan FC hadien ba baroh ar kynhun ki la ïoh ban thep mar ar kol hynne ka sngi ha madan SSA Stadium-Polo, Shillong.
Watla ka jingïakhun ka la kut noh haka jingïakhaid hynrei lah ban kdew ba na ka liang ki paidbah ki la hun jrut ban sakhi ïa ka mynsiem ïakhun jong ka Lajong khamtam eh ïa ki rangkynsai ka jylla kiba la sei madan ïa la ka jong ka sap ha kane ka jingïakhun kaba la pynshohbiej ïa ki nongpeitkai.
Haba phai sha ka jingïakhun, ka kynhun ba ïakhun shabar nala ïing, kata ka Sreenidi ka la plie pyrda ïa ka kol ba nyngkong tang hadien 7 minit ba la ïaid ka por lyngba ka kol u Rosenberg Gabriel ban lamkhmat ïa kane ka jingïakhun.
Hadien ba shah thep, ka Lajong ka la sdang ban tehlakam ïa ka jingïakhun bad ïoh ruh katto katne ki kabu bad dei tad ynda la jam sha ka 24 minit ba ka Lajong ka pynïakhaid lyngba u Ronney Willson Kharbudon u ba la pyndei tiak da ka khlieh ïa ka bol kaba la ïarap pynbuh da u Sangti Janai Shianglong.
Hadien ba la ïoh pynphai, ka la Lajong ka la sdang ban ïoh mynsiem bad ka la ïai bteng ban ñion shakhmat bad ynda la jam sha ka 34 minit ka kynhun lyngba u Takuto Miki ka la ïoh ban thep ïa ka kol kaba ar bad lamkhmat ïa ka jingïakhun da 2-1 kol.
Haba phai pat sha ka jingïakhun jong ka kylla miet, ka Lajong ka la pyrshang ban pynjai-jai ïa ka rukom lehkai hynrei ka Sreenidi Deccan ka la ïai bteng ñion shakhmat bad thaw ïa ki lad da kumno ban ïoh pynïakhaid.
Ka jingïakhun ka la neh shipor ym shym la don ba thep tad haduh da jam sha ka 63 minit ba katei ka kynhun ba ïakhun shabar nala ïing ka la ïoh ban pynïakhaid lyngba u Rosenberg Gabriel kaba dei ka kol kaba ar ïa u ha kane ka jingïakhun.
Hadien ba la shah pynïakhaid, ka la Lajong ka pyrshang katlah katïai ban ïoh lamkhmat biang ïa ka jingïakhun bad ka la ïoh katto katne ki kabu kaba la pynkyndeh ïa ki nongkyrshan hynrei ym shym la don ba lah ban pynurlong.
Haduh kaba kut jong ka jingïakhun ym shym la don ba lah ban pynïakhlad kaba la pynlong ïa ka jingïalehkai ban ïakhaid da mar 2-2 kol.
Lyngba kane, ka Shillong Lajong mynta ka la ïakhaid baroh lai sien lynter ki jingïakhun bad kyntiew 3 point ha ka miej na ki lai sien ïakhun ba ladep.
Ka Shillong Lajong FC kan sa ïakhun biang pat pyshah ïa ka Gokulam Kerala FC ka klob kaba na Kerala la Sngi U Blei (19 tarik u Naiwieng, 2023) ha ka por 2 baje nohphaisngi bad ka madan kan long ha SSA Stadium, Shillong.