Khliehriat, Risaw 26 : Ki nongialam ba hakhmat eh jong ka Jaintia National Council kiba hapoh ka jingialam u President rangbah, u bah Sambormi Lyngdoh, shen kin sa leit sha ka nongbah Delhi bad ai ia ka jingkyrshan ba pura ia ka seng Hynniewtrep Achik National Movement kaban sa leit sha Delhi ban dawa ia ka Inner Line Permit
Katkum u kyrwoh na u Publicity Scretary jong ka JNC, u bah Mebanteilang Sukhlaiñ, la ong ba “Kum ban shu pynkynmaw ba naka por sha ka por ka JNC bad ka HANM ki juh iatreilang ha kaba ïadei bad ki mat kiba ktah ïa ka ri bad ka jaidbynriew bad ïa ka bri u Hynñiewtrep bad kum ban shu phai dien ha ki snem kiba la leit ruh ka JNC bad ka HANM ki la ju iadon lang ne ïatrei lang ha ki shnat bapher bapher, kum ka Confederation of Meghalaya Social Organization (COMSO) ha kaba ka mat kaba hakhmat eh kadei ka ILP bad la pynlong ruh ïaki jingïakhih ha kylleng ki jaka jong ka Bri u Hynñiewtrep.
La kdew ruh ba kum ha Jaiñtia ka JNC kala pynlong jingïakhih ha kiba bun ki jaka ban dawa na ka sorkar pdeng ba ka dei ban pyntreikam noh mardor ïa ka ILP namar dei tang kane kaba long kum ka rishot bah ka ban ïada lane kata ka dawai bah na ka jingpang kaba ma tam jong ka jingwan rung kyrthep jong ki bar jylla ha kane ka bri u hynñiewtrep tad hadien ka jingiakhih kaba heh tam ba la pynlong daka COMSO ha nongbah Shillong ha u snem 2019 kaba la pynlong ruh ïa ka sorkar jylla ban pass ïa ka resolution hapoh ka ïing tahw aiñ ban dawa pyntreikam noh ïa ka ILP naka sorkar pdeng”.
“Hadien kane ruh, dei ha u snem 2022 ba ka HANM bad ka JNC bad kiwei de ki seng ba pawkhmat ka rilum khasi bad Jaiñtia ki la ioh ban thaw da kawei ka shnat kata kadei ka Save Hynñiewtrep Mission ha ka ba la buh ruh ïa ki khyndai tylli ki mat jingdawa kiba dei ban pyntreikam noh mardor bad la pynlong ruh ïa ki jingïakhih bapher bapher ha kylleng ki jaka kum ka jingiaid rally, ki program jingïalang paidbah bad ki jingpyrta slogan”
“Ha kane ka bynta, ka Mission ka la thep ruh ïa ka mat jingdawa ILP kum kawei na ki mat ba kongsan ban pynkynmaw ïa ka sorkar ba ka la dei ban pyntreikam noh namar ka sorkar pdeng ka la pass ïa ka CAB lane ka CAA, nalor kane ka mission ka la dawa ruh na ka sorkar pdeng ba ka dei ban ban ithuh noh ïa ka ktien khasi bad ban pynrung noh hapoh ka khyrnit kaba phra ha ka riti synshar ri lane ka constitution jong ka ri India”
“Haba phai sha ki mat kiba ktah ïa ka ri lum khasi bad Jaiñtia, ka JNC bad ka HANM ki juh iatreilang ruh na ka bynta ka im ka iap jong ki paradoh parasnam kiba kythup ki mat kiba ïadei bad ki jingïa kajia khappudum kiba ha ki jaka bapher bapher ha ri lum Khasi bad Jaintia”
“Kumta ha kane ka kynti ruh ka JNC da kawei ka sur kan sa leit lang sha nongbah Delhi ban ai ka jingkyrshan kaba pura ïa ka HANM ban pyni bad ban pynbor ïa ka sorkar pdeng ba ka la dei ka por ban ai noh ïa ka ILP ha jylla Meghalaya, ka seng ka bynrap ruh ba lada ha Manipur ka sorkar pdeng ka lah ai, balei pat ha Meghalaya?. Ngi dawa ïa la ka jong ka hok, na ka bynta ban ïada bad pynneh pynsah ïa la ka khyndew ka shyiap ka riti ka dustur, te kan eh aiu ïa ka sorkar pdeng ban ai ïa ngi ia ka ba ngi dei hok ban ïoh” pynkut u kyrwoh na ka JNC.
