Jowai, Risaw 26 : Ka Jowai Municipal Board (JMB) West Jaiñtia Hills District mynta ka sngi kala ïoh ïa ar tylli ki trok kit ñiut, ka kali kit um, kawei ka ‘Organic Waste Converter Composting Machine’ ban pynkylla sboh bad kawei ka ‘Bailing Machine’ ban song ïa ki ñiut plastic.
Ïa kine ki kali bad ki mashim thymmai la wan ban plie bad khap ïa u ribbon da u MLA ka 2-Jowai Constituency ma Wailadmiki Shylla uba dei ruh u Chairman ka MUDA bad kane ka long shi bynta ban kham pynsuk shuh shuh ïa ka rukom treikam jong kane ka tnad ba peit ïa ka khuid ka suba hapoh ka sor Jowai.
La plie paidbah ïa ki ha ka jingïalang paidbah ba la pynlong ha phyllaw jong katei ka ophis kaba don ha Khimusnaing (PHE), ba la pynïaid da u Chairman jong ka JMB ma Lasooki D. Lakiang, haka jingdonlang u kongsnam MLA, ka CEO JMB kong D.V. Lyngdoh (MCS) Additional Deputy Commissioner, u Dalloi ka Elaka Jowai ma Puramon Kynjing, ki Waheh Shnong nalor kiwei de.
U ma Wailadmiki Shylla haba ai jingkreh ula pynpaw ka jingïaroh ïaki nongtrei jong ka JMB kiba la trei shitom wat hapdeng ki jingeh kaba ki ïakynduh, hynrei na ka liang jong u kum u MLA ka thaiñ ula pynshang katba lah ban pynbeit ïa ki jingeh jong kane ka tnad khamtam ha kaba ïadei bad ka jingsiew ïa ka tulop.
Kum u MLA ula pynsngew ‘ha kine ki snem kiba la dep kila mih shibun ki jingkynthoh namar ka thma jong ki ñiut kiba la neh shah hapoh ka Jowai’ bad kane kala mih ruh ka jingshah kdew ha kiba bun ki liang kum u nongmihkham ka Jowai. Hynrei mynta kane ka tnad kala sdang ban kylla ha ka rukom treikam na ka bynta ka jingbit jingbiang jong kiba bun ba lang.
Ha kaba ïadei bad Waste Recovery Center (WRC) ula ai khublei kyrpang ïa ka Seiñ Raij Jowai bad ka Dorbar Shnong Sabah Muswang kiba la pynïoh ïa ka jaka ban buh ïa kane ka Waste Recovery Center (WRC) na ka bynta ban pynïakhad ïa ki ñuit katkum ka juk ba mynt, hadien ka jingïoh nuksa na kawei na ki Waste Recovery Center (WRC) kaba don ha Umpling Shillong.
Shi bynta ka jingkhuid na ka jingkhuid jingsuba jong ka Wah Myntdu u MLA ula ong ‘ka sorkar kala dep ban mang pisa haduh 19 klur ban shna ïa ki 11 tylli ki in-situ nala kiba lah ban khanglad ïa ki jaboh jabaiñ ban tuid sha ki bynta ka Wah.
Ha kaba ïadei bad ka jingdonkam haka ophis (Administration) ka JMB naka liang ka Urban Department kala dep ban Sanction shuh shuh ïa ki post hapoh kane ka tnad kaba dei ka (Autonomous) bad kaba peit dalade ïalade, ula pyntip ruh kino kino ki Appointment la leh beit da kane hi ka ophis hi kaba don ïa ka Committee kaba kynthup ïa u Chairman, Secretary CEO bad sa uwei u ban thung da ka ophis DC.
