Yn pyni paidbah ïaka phlim “Johkhe.com” naduh mynta ka sngi 27 tarik ha Loompyrdi Iongpiah

Jowai, Risaw 26: Ka Sai Yei Sap Entertainment Production, Jowai mynta ka sngi 26 tarik haka por 5 baje janmiat kila pyllait paidbah ïa ka Phlim jong ki kaba ai kyrteng ka “Johkhe.com” ha Loompyrdi Iongpiah Hall, Jowai da u kongsan ma Comingone Ymbon uba dei u myntri jong ka sorkar jylla.
Hashwa ban pyni paidbah ïa kane ka phlim Pnar ka “Johkhe.com” ha Nongbha Jowai la don ka jingïalang kaba lyngkot ba la pynïaid da u ma Tympang Laloo, la ïoh ruh ka jingduwai ainguh da u Kyrshan Synnah bad kumjuh na u Marbud Laloo Producer jong kane ka phlim.
Na ka liang u kongsan haba ai jingkren ula ai ka jingïaroh ïa ki nongpynmih ïa kane ka phlim haka ktien Pnar bad ha ka juh ka por kan long ruh kum ka lad ban ai kam ïa ki khun samla ha ka rukom ak phlim. Ula ong ruh ba ki nongak phlim pnar mynta kila sdang ban ban kiew ha baroh ki liang. ula ai mynsiem ïa ki khun samla ba kin ïeng hala ki jong ki kjat ban seng ïa ki kam la jong.
Ha kaba ïadei ba ki jaka peit phlim ne ki ‘Cinema Hall’ ula khot ïa kino kino ki riew shimet ne ki kynhun kiba don jingmut ban shan ïa kine ki Cinema ba kin wan shakhmat namar ka sorkar ka long kaba kloi ban ai jingïarap ïa ki lyngba ki skim bapher bapher.
Ha kane ka sngi la ïadonlang naduh ki Dolloi ka Elaka Jowai ma Puramon Kynjing, u President ka Seiñraij Jowai ma Hercules Toi, u Waheh Shnong ka Iongpiah ma R.L. Bimee Suwer, ki riew rangbha ka shnong bad ki paidbah kiba la wan ban peit nyngkong ïa kane ka phim ha nongbah Jowai. Katba ïa ki kyntien ai khublei la ïoh na u Dao Toi.
La pyntip ba ïa kane ka phlim yn pyni paidbah ha Loompyrdi Iongpiah Hall naduh lashai ka sngi 27 tarik ha ka sngi Saturday-Sunday haka por 2:00 pm, 5:00 pm bad 8:00 pm, katba ha ka sngi Monday-Friday haka por 5:00 pm bad ka por 8:00 pm. Na ka bynta ka bai ticket kan long 100/- ïa kiba hapoh 13 snem bad 150/- kiba shaneng.