Ïakhaid ka Kynjoiñ Umran bad Nongthymmai Kyrdem ha ka sngi sdang ka Ri-Bhoi Super League ka RBDSA
Ka jingïakhun ha katei ka sngi ka la long hapdeng ka Kynjoiñ Umran pyrshah ïa ka Nongthymmai Kyrdem kaba la kut da jingïakhaid da 1-1 kol.
Nongpoh, Risaw 26: Hadien ba ka Ri-District Sports Association (RBDSA) kala dep ban pynlong dang shen ïaka General League mynta ka sngi kala ioh ban sdang pat sa ïaka Super League ha madan ïalehkai ka Umsning Sports and Cultural Club ha Patarim da ka jingangnud ban kyntiew ïaki kynhun ïalehkai na ka them Ri-Bhoi.
Ïa katei ka lympung ïalehkai Ri-Bhoi Super League la wan ban plie paidbah mynta ka sngi da u Raja Brahma Additional Deputy Commissioner ka Ri-Bhoi District kum u kongsan bad u Bah Boby Nongbet Districty Sports Officer ka Ri-Bhoi District kum u symbud kongsan haka jingdonlang u Bah E Lyngdoh BDO Umsning C&RD Block, Bah Donlang Sohkhlet Vice Chairman ka MREGC, Bah RB Shadap President ka RBDSA bad kiwei kiwei ki riew rangbah.
Ka jingïakhun plie pyrda ha katei ka sngi kala long hapdeng ka Kynjoiñ Umran pyrshah ïaka Nongthymmai Kyrdem ha kaba ka jingïakhun kala long kaba itynnad ha kaba baroh 2 kynhun kila ïakhun tyngeh ban ioh rah ïaka nam jop haka jinglehkai ba nyngkong hynrei ka jingïakhun ha katei ka sngi kala kut noh hapdeng ka jingïakhaid da 1-1 kol.
Naka liang u Raja Brahma kum u kongsan haba kren ha katei ka sngi u la ai ka jingïaroh ïaka RBDSA kaba la shim ïaka sienjam ban pynlong kum katei ka lympung da ka jingangnud ban lum ban lang ïaki khun samla kiba don sap ha ka kam ïalehkai namar naduh ka General League bad Super League ki kynhun ïalehkai ki poi kumba 75 tylli eiei.
U la ong ruh kam myntoi ban ïakhun than ïaki kam pynroi katba iehnoh shadien ïaki khun samla kiba don sap haki kam ïalehkai, da kaba ai mynsiem ruh ba kum ka bor district kin don ryngkat ban kyntiew ïaki kam ïalehkai haka district, u la bynrap.