Mawkyrwat, Risaw 26: Ka Hyñniewtrep Achick National Movement (HANM) jong ka South West Khasi Hills District mynta ka sngi kum ka dak jong ka jingaimynsiem halor ka jingtrei shitom jong u Dr. Wanbudmi Sutnga, Medical Superintendent ba dei peit hapoh ka Civil Hospital, Mawkyrwat, South West Khasi Hills District ki la pynkup burom kyrpang da kaba ai da ka kynja momentous ryngkat ka jingpynkup da ka jaiñ.
Ïa ka kynhun ban leit pynkup burom, la lamkhmat da u Lambokstar Marweiñ, President jong ka HANM, South West Khasi Hills District ha ryngkat ka jingïasynranglang da ki dkhot jong ka HANM.
U Lambokstar Marweiñ, President jong ka HANM, South West Khasi Hills District haba kren ha ki lad pathai khubor hadien ka jingpynkup burom, u la ong ba kane ka jingleit pynkup burom jong ka HANM ïa u Dr. W. Sutnga ka dei halor ki kam ba bha ba u la pyni da kaba u la wanrah shibun kiei kiei ki jingkylla hapoh jong ka jaka sumar hapoh Civil Hospital Mawkyrwat. U la ong ruh ba da ka jingtrei shitom jong u Dr. Sutnga bun bah ki jingdonkam hapoh kane ka jaka sumar ki la sdang ban biang lut haba ïa nujor bad ki bnai kiba la dep.
U la ong shuh shuh ba ha kaba ïa dei bad ki jingdon jong ki Doktor, katkum ki jingdonkam ki dang duna bha namar katkum ka jingtip ba haduh mynta ki dang don tang 12 ngut ei ei ki doctor pynbann ka jingdonkam ha kane ka Civil Hospital la kumno ki dei ban don 30 ngut ei ei khnang ban yn lah ban ai ka jingshakri kaba biang ïa ki nongpang.
“Ïa kane ka bynta u Dr. Sutnga u la pynpaw ba un sa leh ïa kaba donkam khnang ba ki paidbah kin nym ïa kynduh jingeh ha ka liang ka koit ka khiah”, ïathuh u bah Lambok.
Ha kawei pat ka bynta, ka HANM lyngba u President ka kyntu ruh ïa ki nongtrei hapoh kane ka jaka sumar ba kin wan ha ka por ba biang katkum ki jingdonkam namar don katto katne ki nongtrei ba kim burom ïa ka por haba ki wan trei hapoh kane ka jaka sumar bad ki wan katba ki mon, kumta ka long kaba donkam ba kum ki nongtrei ki dei ban ïa burom mar kylliang khnang ba ki kam hapoh kane ka jaka sumar kin long kiba ïaid beit ïaid ryntih.
Ha kawei pat ka liang ki paidbah ruh kin ïa burom lem ïa ka por hapoh jong kane ka jaka sumar kata ka long na ka bynta kito ki briew kiba kwah ban wan peit ïa kiba thiah pang bad kumjuh ruh ki dei ban sumar khuid ïa ki sawdong sawkun jong kane ka jaka sumar khnang ba kan long kaba itynnad bad kaba ïaid beit ïaid ryntieh ha ki liang baroh.
“Ban wanrah ïa ki kam kiba jop la ha kano kano ka bynta, kaba donkam ka long ban don ka jingïatreilang na baroh ki liang la ka long na ki paidbah ne wat napoh jong ka Civil Hospital baroh kawei”, ong u bah Lambok.
