Kynjoh 25 snem kynthih ka St Xavier’s Secondary School New Nongstoiñ

Nongstoiñ, Risaw 26: Ka St Xavier’s Secondary School New Nongstoiñ, ka la ïoh ban kynjoh sha u Mawmer ka jingdap 25 snem mynta u snem bad ha ka sngi palei kaba dei 26 tarik Risaw 2023, ka la ïoh ban rakhe lehkmen ïa ka jubili rupa ïa kaba la pynlong ha phyllaw katei ka skul kaba don ha sor Nongstoiñ.
Ha kane ka, u bah Vincent H.Pala MP ka lok sabha Shillong kum u kongsan, u la wan ban plie pyrda ïa katei ka jingsdang rakhe lehkmen jubili, ryngkat ka jingïasynranlang u Most Rev Wilbert Marweiñ Bishop ka Nongstoiñ, phadar Roland Lyngdoh Principal ka St Xavier’s Secondary School New Nongstoiñ bad kiwei kiwei kynthup ïa ki ophisar kiba na ka tnad ka pule puthi West Khasi Hills District.
Kum shi bynta ban pynshit pynshngaiñ ïa katei ka sngi kyrpang, la ïoh ruh ïa ki jingshad jingrwai bad kiwei kiwei ki jingpynbyrngia na ki khynnah skul bad na ki nonghikai katei ka skul.
La pynpaw ruh ha ka jingrakhe ba ïa katei ka jubili rupa, yn rakhe mynta baroh shi snem da ki program bapher bapher bad yn ïoh ruh ban khang pyrda pat ha u snem ban wan, ïa ka ban pynkut ïa ka jingrakhe lehkmen jong ka skul.
U kongsan haba ai jingkren u la ïaroh jur ïa ki nongseng nyngkong ïa katei ka skul, namar kaei kaba ki la mad ha ki 25 kam dei kaba suk. U la ïaroh ïa ki kmie ki kpa jong ki khynnah skul kiba la don bynta lang ha ka ban phah skul ha katei ka shlem, khamtam eh ïa ki nonghikai kiba la long ki rishot jong ka skul, namar lyngba ka jingtrei shitom ha ka jingsiew kaba rit bad kiba la ïaishah ban pynnang pynstad ïa ki khynnah mynta ka long kumne kumba ka long.
U la ong ruh ka long shisha kaba sngew tynnad ban ïoh sngew ba kane ka skul, kam da buh than ïa ka thong ban ïa ryngkat bor bad kiwei pat ki skul, ban wan shakhmat bad ban paw ha ka pule puthi. Hynrei, la hikai ruh kumno ban nang ïa ka burom ka akor bad kata ka dei kaba kongsan ïa u briew haba im ha ka pyrthei.
Lah ban kdew hangne ba ïa kane ka skul la seng khnang na ka bynta kiba duna ha ka ïoh ka kot. Ka dei ruh ka skul kaba ha ka jingsiew kaba rit tam ha ka bai skul baroh shi snem haba ïa nujor bad kiwei pat ki skul kiba don ha ka thaiñ.