Kylla ka Scorpio ha Dulongnar, mynsaw 7 ngut, lano yn weng ka NHAI ïa ki maw ba lum thup harud surok?

Nongpoh, Risaw 26: Kawei ka kali Scorpio kaba dang hiar na Shillong sha Guwahati bala ñiah da u Samiulla Ali na Assam kala kylla lyndang harud surok bah National Highway 6 mar syndah ka shnong Dulongnar bad Umdihar bad ha katei ka jingjia haduh 7 ngut ki nongleit jingleit kila mynsaw bad napdeng jong ki 2 ngut ki mynsaw jur.
Kane ka jingjia kala jia hynnin ka janmiet haka por 5 baje eiei ha kaba katei ka Scorpio kaba don ïa u number AS 01 DH 1716 ka dang mih na nongbah Shillong ban leit sha Guwahati hynrei ynda poi ha katei ka jaka u nongñiah katei ka scorpio u la leit ban tynrah ïa u divider haduh ba kan da kylla syndon harud surok kaba dei ruh ka jaka ba ka NHAI kam pat weng ïaki mawria bala lum thup harud surok khlem pat pynbha haduh mynta wat bun naki paidbah kila ud ïa katei ka jaka.
Kitei ki 2 ngut kiba la mynsaw jur la tip kyrteng kum ka Khodija Begum bad ka Salima Khatun na Ullubari Guwahati bala pynkit noh mar mar sha ki jaka sumar ban ioh ka jingsumar ba kyrkieh bad halor katei ka jingjia naka liang ki pulit ka Nongpoh kila shimkhia ban pynlong ka jingtohkit.
Ka jingkylli nakiba bun ki paidbah ka mih ruh lano yn weng ka NHAI ïaki mawria bala shu lum thup mynta ka bun bnai ha katei ka jaka kaba la pynthud ïaka leit ka wan jong ki paidbah khamtam kaba la buh jingma ruh namar bun ki jingjia aksiden ki ju jia ha katei ka jaka namar ka jingsniew jong u surok bad ka jingwit jong ki mawria bala shu lum thup ha surok bah, ha kaba ka NHAI ka dei ban weng mardor bad ban pynbha ïa u surokbah National Highway ban lait na kano kano ka jingjia ba sngewsih hadien habud.